شوہر نے تین طلاقناموں پر بغیرپڑھے دستخط کردیئے۔

استفتاء

مفتی صاحب: میں نے اپنی بیوی کو تین طلاقوں کے نوٹس بھیجے تھے۔ جس کے بارے میں میرا حلفی بیان درج ذیل ہے:

’’شوہر کا حلفیہ بیان:

میں **** ولد چوہدری **** حلفیہ اقرار کرتا ہوں کہ میں نے اپنی بیوی **** دختر **** کو جو طلاق کے 3 نوٹس 2022-08-01کو بھجوائے وہ نوٹس میں نے سیاق و سباق پڑھے بغیر دستخط کیے اور دستخط بھی اس وجہ سے کیے کیونکہ میری خالہ کا بیٹا ****عابد ولد نسیم احمد اس نے مجھے بتایا کہ آپ کی بیوی آج ہی آپ سے طلاق کا مطالبہ کررہی ہے جوکہ مجھے بعد میں اپنی بیوی سے رابطہ کرنے پر پتہ چلا کہ ****عابد نے مجھ سے صریحا جھوٹ بولا ہے اور شرارت کی ہے لہذا میں اپنی بیوی **** سے رجوع کا خواہاں ہوں …فيصل منير‘‘

پہلے طلاقنامے کی عبارت:                                                                           طلاق نامہ نوٹس اول:

 (فریق اول) **** ولد چوہدری **** ساکن محلہ **** (فریق دوئم) **** دختر **** … … … فریق اول فریق دوئم کوا ٓج بقائمی ہوش و حواس خمسہ درستگی عقل مسماۃ **** کو نوٹس طلاق اول دیتا ہوں … 2022-08-01  طلاق دہندہ ****‘‘

دوسرے طلاقنامے کی عبارت:

طلاق نامہ نوٹس دوئم:

 (فریق اول) **** ولد چوہدری **** ساکن محلہ **** (فریق دوئم) **** دختر **** … … … فریق اول فریق دوئم کو آج بقائمی ہوش و حواس خمسہ درستگی عقل مسماۃ **** کو نوٹس طلاق دوئم دیتا ہوں … 2022-09-01طلاق دہندہ ****‘‘

تیسرے طلاقنامے کی عبارت:

طلاق نامہ نوٹس سوئم:

(فریق اول) **** ولد چوہدری **** ساکن محلہ **** (فریق دوئم) **** دختر **** … … …فریق اول فریق دوئم کو آج بقائمی ہوش و حواس خمسہ درستگی عقل مسماۃ **** کو نوٹس سوئم طلاق دیتا ہوں طلاق دیتا ہوں طلاق دیتا ہوں … لہذا فریق اول فریق دوئم کو آج بقائمی ہوش و حواس خمسہ درستگی طلاق تیسرا اور آخری نوٹس دے کر اپنی زوجیت سے الگ کرتا ہے۔ آج کے بعد من مظہر کا مسماۃ مذکوریہ سے کوئی تعلق واسطہ نہ ہے۔ مسماۃ مذکوریہ عدت پوری کرنے کے بعد جہاں چاہے عقد ثانی کرے مجھے کوئی اعتراض نہ ہوگا۔ … 2022-10-01  طلاق دہندہ ****‘‘

مذکورہ مسئلہ کے بارے میں کیا حکم ہے؟

تنقیح: بیوی کو پہلے طلاقنامے کے بعد اب دوسری مرتبہ پیریڈ (حیض) آیا ہے (2022-09-18)۔

الجواب :بسم اللہ حامداًومصلیاً

مذکورہ صورت میں تینوں طلاقیں واقع ہوچکی ہیں جن کی وجہ سے بیوی شوہر پر حرام ہوچکی ہے لہٰذا اب  نہ رجوع ہوسکتا ہے اور نہ صلح کی گنجائش ہے۔

توجیہ: مذكوره صورت ميں اگرچہ شوہر کا یہ کہنا ہے  کہ اس نے غلط فہمی میں دستخط کیے ہیں لیکن اس غلط فہمی کا یہاں کوئی اعتبار نہیں اور شوہرنے اگرچہ طلاقناموں  کو پڑھے بغیر دستخط کیے ہیں لیکن چونکہ شوہر کو کم از کم اتنا تو علم تھا کہ یہ طلاقنامے ہیں لہٰذا   ان تینوں طلاقناموں  سے کم سے کم ایک  ایک رجعی طلاق واقع ہونے سے تینوں طلاقیں واقع ہوگئیں اور تیسری طلاق چونکہ مغلظہ ہوتی ہے اس لیے اس کے بعد رجوع یا صلح کی گنجائش باقی نہیں رہی۔

شامی (442/4) میں ہے:

 ”[مطلب في الطلاق بالكتابة]: (قوله كتب الطلاق إلخ) قال في الهندية: ‌الكتابة ‌على ‌نوعين: مرسومة وغير مرسومة، ونعني بالمرسومة أن يكون مصدرا ومعنونا مثل ما يكتب إلى الغائب. … … … وإن كانت مرسومة يقع الطلاق نوى أو لم ينو ثم المرسومة لا تخلو إما أن أرسل الطلاق بأن كتب: أما بعد فأنت طالق، فكما كتب هذا يقع الطلاق وتلزمها العدة من وقت الكتابة.

بدائع الصنائع (3/295) میں ہے:

”و اما الطلاق الثلاث فحكمها الاصلي هو زوال الملك و زوال حل المحلية ايضا، حتی لایجوز له نكاحها قبل التزوج بزوج آخر لقوله عزوجل ، ’’فان طلقها فلا تحل له من بعد حتي تنكح زوجا غيره.“

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم