"تم میرے گھرسے نکل جاؤ،اور دوسری شادی کرلینا، میں تمہیں جواب دے دوں گا” کہنے سے طلاق کا حکم

استفتاء

کیا فرماتے ہیں علمائے کرام ومفتیان عظام اس مسئلے کے بارے میں کہ زید نے غصےمیں اپنی بیوی کو کہا کہ "تم میرے گھرسے نکل جاؤ،اور دوسری شادی کرلینا، میں تمہیں جواب دے دوں گا” تو زید کے لیے عند الشرع کیا حکم نا فذ ہوگا۔؟

وضاحت مطلوب ہے کہ یہ الفاظ کہتے ہوئے زید کی کیا نیت تھی؟

جواب وضاحت: کوئی نیت نہیں تھی۔

الجواب :بسم اللہ حامداًومصلیاً

مذکورہ صورت میں چونکہ زیدنے طلاق کی نیت نہیں کی تھی اس لیے کوئی طلاق واقع نہیں ہوئی۔ تاہم طلاق کی نیت نہ ہونے پر زید کو بیوی کے سامنے قسم دینی ہوگی اگر زید قسم دینے سے انکار کرے تو بیوی اپنے حق میں ایک بائنہ طلاق شمار کرے گی ۔بائنہ طلاق کا حکم یہ ہے کہ سابقہ نکاح ختم ہوجاتا ہے اور دوبارہ اکٹھے رہنے کے لیے کم از کم دو گواہوں کی موجودگی میں نئے مہر کے ساتھ دوبارہ نکاح کرنا ضروری ہوتا ہے۔

توجیہ:مذکورہ صورت میں زید کے یہ الفاظ کہ  "تم میرے گھرسے نکل جاؤ،اور دوسری شادی کرلینا "کنایات  طلاق کی پہلی قسم میں سے ہیں جن سےطلاق کا واقع ہونا  ہر حال میں نیت پر موقوف ہوتا ہے چونکہ زیدنے طلاق کی نیت نہیں کی تھی اس لیے کوئی طلاق واقع نہیں ہوئی۔

اور زید کے ان الفاظ سے کہ” میں تمہیں جواب دے دوں گا”بھی کوئی طلاق واقع نہیں ہوئی کیونکہ ان الفاظ سے شوہر فی الحال   طلاق نہیں دے رہا بلکہ  مستقبل  میں طلاق دینے کا وعدہ کر رہا ہے اورطلاق دینے کا  وعدہ کرنے سے طلاق واقع نہیں ہوتی ۔

النتف فی الفتاویٰ للسغدی (1/327) میں ہے:

وقسم منها يصدق الرجل فيه على اي وجه كان ان كان في حال الرضا او في حال الغضب او علي تقدمة ذكر الطلاق وهو قوله……… انكحي من شئت او تزوجي او تزوجي من شئت او اذهبي او اذهبي حيث شئت او قومي او اخرجي….. الخ

البحر الرائق (3/526) میں ہے:

وحاصل ما في الخانية أن من الكنايات ثلاثة عشرة لا يعتبر فيها دلالة الحال ولا تقع إلا بالنية حبلك على غاربك تقنعي تخمري استتري قومي اخرجي اذهبي انتقلي انطلقي تزوجي اعزبي…. الخ

البحر الرائق(3/439) میں ہے:

وليس منه أطلقك بصيغة المضارع إلا إذا غلب استعماله في الحال كما في فتح القدير

المحیط البرھانی (5/245) میں ہے:

سئل نجم الدين النسفي رحمه الله عن زوجين وقعت بينهما مشاجرة فقالت المرأة: من باتونمى باشم مرا طلاق كن، فقال الزوج: طلاق مي كنم طلاق مي كنم طلاق مي كنم؟ أجاب وقال: انها تطلق ثلاثاً؛ لأن قوله: طلاق مي كنم يتمحض للحال وهو تحقيق بخلاف قوله: كنم؛ لأنه يتمحض للاستقبال وهو وعد بالعربية قوله: أطلق، لا يكون طلاقاً  لأنه دائر بين الحال والاستقبال فلم يكن تحقيقاً مع الشك ……وهذا الاحتمال بالعربية، أما بالفارسية فقوله: ميكنم للحال، وقوله: كنم للاستقبال.

در مختار (4/521)میں ہے:

والقول له بيمينه في عدم النية ويكفي تحليفها له في منزله فإن أبى رفعته للحاكم فإن نكل فرق بينهما  مجتبى

وفي الشامية تحت قوله ( بيمينه ) فاليمين لازمة له سواء ادعت الطلاق أم لا حقا لله تعالى ط  عن البحر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم