بیوی کے سامنے طلاق کے  مسائل بیان کرنے سے طلاق کا حکم

استفتاء

میر ابیٹا   اپنی بیوی سے طلاق  کے بارے میں  بحث کر رہا تھا اس نے اپنی بیوی  کو مسئلہ بتاتے ہوئے کہا کہ ’’اگر کوئی اپنی  بیوی  کو کہے  تم کو تین طلاق  ہو تو وہ طلاق ہوجاتی ہے ، چاہے مذاق میں ہو ، مثال کے طور پر  اگر میں تمہیں کہوں کہ تمہیں   طلاق، تو طلاق ہو جاتی ہے‘‘۔اب کسی نے اس کو بتایا  ہے کہ تمہاری بیوی بھی تم پر طلاق ہوگئی ہے۔  میرا بیٹا کہتاہے کہ میں کیا کروں؟ كيا مذكوره صورت ميں طلاق واقع ہوگئی ہے؟

الجواب :بسم اللہ حامداًومصلیاً

مذکورہ صورت میں طلاق واقع نہیں ہوئی ۔

توجیہ :طلاق  کے الفاظ   سے طلاق واقع ہونے  کے لئےبیوی کی طرف طلاق کی نسبت کا قصد وارادہ ہونا  ضر وری  ہےمذکورہ صورت میں چونکہ شوہر نے بیوی کی طرف طلاق کی نسبت  نہیں کی   بلکہ اس نے مثا ل  کے  طور پر طلاق  کے الفاظ  بولے ہیں  اس  لیے ان الفاظ سے طلاق واقع نہیں ہوئی  ۔

ردالمحتار (4/448) میں ہے:

لا بد في وقوعه قضاء وديانة من قصد إضافة لفظ الطلاق إليها عالما بمعناه ولم يصرفه إلى ما يحتمله كما أفاده في الفتح وحققه في النهر احترازا عما لو كرر مسائل الطلاق بحضرتها أو كتب ناقلا من كتاب امرأتي طالق مع التلفظ أو حكى يمين غيره فإنه لا يقع أصلا ما لم يقصد زوجته.

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم