حالت حمل میں تحریری طلاق دینے کا حکم

استفتاء

کیا فرماتے ہیں مفتیان کرام اس مسئلہ کے بارے میں کہ میں نے اپنی بیوی کو تحریر طور پر طلاق دی ہے،  پہلی طلاق *** کو دی تھی اور بقایا دو طلاقیں   *** کو  ایک ہی طلاقنامے میں لکھ  کر دی تھیں ، دونوں مرتبہ طلاقنامے پر دستخظ کرتے ہوئے مجھے علم تھا کہ کتنی طلاقیں لکھی ہوئی ہیں اور طلاقناموں کو پڑھ کر میں نے دستخط کیے تھے، اس وقت میری بیوی سات ماہ کی حاملہ تھی، کیا مذکورہ صورت میں طلاق واقع ہو گئی ہے؟

پہلے طلاقنامے کی عبارت:

Now this deeds witness that I said ***** of  **** do hereby divorce you ***** by pronouncing up her Talaq at once in presence of two witness:

 ***** I divorce you *** D/O 

(Single Talaq)

ترجمہ: اب یہ تحریر ثبوت ہے کہ***  دو گواہوں کی موجودگی میں ان الفاظ کے ساتھ ایک مرتبہ تمہیں طلاق دیتا ہوں****    ’’میں تمہیں طلاق دیتا ہوں*****(ایک طلاق)‘‘

دوسرے طلاقنامے کی عبارت:

’’فریق اول نے کافی سوچ وبچار کے بد فیصلہ کیا کہ وہ فریق  دوئم کو بقایا دو طلاقیں دے کر اپنی زوجیت سے الگ کردے کیونکہ آئندہ مستقبل میں دونوں فریقین کے درمیان حالات بہتر ہونے کی کوئی امید نہیں ہے۔

میں****   اپنی زوج****  کو طلاق دیتا ہوں۔

میں ****  اپنی زوجہ****  کو طلاق دیتا ہوں۔

لہٰذا آج مؤرخہ **** کو فریق اول نے یہ تحریر یعنی طلاق نامہ بقائمی حواس خمسہ بلا جبر ودباؤ تحریر کردیا تاکہ بوقت ضرورت کام آئے‘‘ فریق اول :****

الجواب :بسم اللہ حامداًومصلیاً

حمل کی حالت میں دی گئی طلاق بھی واقع ہو جاتی ہے لہذا مذکورہ صورت میں   تینوں طلاقیں واقع ہو گئی ہیں، جن کی وجہ سے بیوی شوہر پر حرام ہو گئی ہے، اب نہ رجوع ہو سکتا ہے اور نہ صلح کی گنجائش ہے۔

توجیہ: مذکورہ صورت میں   جب شوہر نے پہلے طلاقنامے پر دستخط کیے تو  اولا تو طلاقنامے کے ان الفاظ سے کہ

I the said **** son of ****  do hereby divorce you *** by pronouncing up her TALAQ at onc in presence of the two witnesses: I divorce you ***  D/O **** (Single Talaq”  (میں *****دو گواہوں کی موجودگی میں ان الفاظ کے ساتھ  ایک مرتبہ تمہیں طلاق دیتا ہوں****’’میں تمہیں طلاق دیتا ہوں*****  (ایک طلاق)) دو رجعی طلاقیں واقع ہو گئیں،  پھر دو دن بعد جب شوہر نے دوسرے طلاقنامے پر دستخط کیے  تو الصریح یلحق الصریح کے تحت تیسری  طلاق بھی واقع ہو گئی، اور اگر بالفرض پہلے طلاقنامے سے ایک رجعی طلاق واقع ہوئی ہے تو  دوسرے طلاقنامے کے ان الفاظ سے کہ ’’میں محمد آصف ولد عبد الرحیم اپنی زوجہ مسماۃ ماہین بنت محمد مناف کو طلاق دیتا ہوں،  میں*** اپنی زوجہ **** کو طلاق دیتا ہوں‘‘    مزید دو طلاقیں واقع ہو گئی ہیں ، خلاصہ یہ ہے کہ بہرحال تین طلاقیں واقع ہو گئی ہیں اور بیوی شوہر پر حرام ہو گئی ہے ۔

در مختار (422/4) میں ہے:

(وحل طلاقهن) أي الآيسة والصغيرة والحامل.

فتاوی شامی (442/4) میں ہے:

قال في الهندية: الكتابة على نوعين: مرسومة وغير مرسومة، ونعني بالمرسومة أن يكون مصدرا ومعنونا مثل ما يكتب إلى الغائب. وغير المرسومة أن لا يكون مصدرا ومعنونا، وهو على وجهين: مستبينة وغير مستبينة، فالمستبينة ما يكتب على الصحيفة والحائط والأرض على وجه يمكن فهمه وقراءته. وغير المستبينة ما يكتب على الهواء والماء وشيء لا يمكنه فهمه وقراءته. ففي غير المستبينة لا يقع الطلاق وإن نوى، وإن كانت مستبينة لكنها غير مرسومة إن نوى الطلاق یقع وإلا لا، وإن كانت مرسومة يقع الطلاق نوى أو لم ينو.

درمختار (4/528) میں ہے:

(الصريح يلحق الصريح و) يلحق (البائن) بشرط العدة.

بدائع الصنائع (3/295) میں ہے:

وأما الطلقات الثلاث فحكمها الأصلي هو زوال الملك، وزوال حل المحلية أيضا حتى لا يجوز له نكاحها قبل التزوج بزوج آخر؛ لقوله – عز وجل – {فإن طلقها فلا تحل له من بعد حتى تنكح زوجا غيره} [البقرة: ٢٣٠] .

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم