اونچاس کروڑ ثواب دین کے کسی ایک شعبے کے ساتھ خاص نہیں

استفتاء

ہمارے ایک تبلیغی ساتھی ہیں وہ کہتے ہیں کہ جو آدمی  تبلیغ کی نیت سے اپنے محلہ کی مسجد میں آئے گا اس کو انچاس کروڑ  کا ثواب ملےگا جبکہ دوسرے ساتھی کہتے ہیں کہ یہ ہجرت کرنے پر ہے یعنی جب آدمی اپنا مقام چھوڑ کر  دور تشکیل پر جائے گا پھر یہ ثواب ملے گا ۔ کیا محلہ کی مسجد میں تبلیغ پر انچاس کروڑ کا ثواب ملے گا؟

الجواب :بسم اللہ حامداًومصلیاً

ثواب کی اصل بنیاد رضائے الہی کے جذبے کے ساتھ اللہ کی راہ میں گھر سے نکلنے پر ہے خواہ  قریب کے کسی مقام  کی طرف جانا ہو یا  دور کے مقام کی طرف ۔    نیز ثواب کا حکم اللہ کی راہ میں نکلنے والے ہر فرد کے لئے ہے چاہے اس کا نکلناتبلیغ دین کے لئے ہو یا حج، جہاد  اور تعلمِ دین وغیرہ کے لئے ہو۔

قال رسول الله صلى الله عليه وسلم إنما الأعمال بالنيات إلخ.  (البخاری)

وعن عبادة بن الصامت رضی الله عنه قال قال رسول الله ﷺ علیکم بالجهاد في سبیل الله فإنه باب من أبواب الجنة یذهب الله به الهم والغم (وزاد فیه غیره ) وجاهدوا في سبیل الله القریب والبعید وأقیموا حدود الله القریب والبعید ولا تأخذکم في الله لومة لائم. (مستدرک حاکم:  رقم الحديث: 2404، 2/ 84)

باقی رہا یہ کہ اس ثواب کی مقدار انچاس کروڑہے اس کے بارے میں اس عدد کے ساتھ صریح حدیث نہیں البتہ درج ذیل احادیث کو پیش نظر رکھ کر اس کا حسا ب لگایا جا سکتا  ہے۔ پہلی روایت  میں ہے کہ جع شخص اللہ کی راہ میں نکل کر خرچ کرے اس کو ایک روپے عوض سات لاکھ روپے کا ثواب ملے گا  جس کے الفاظ یہ ہیں  ۔                                                                                                         

قال رسول الله ﷺ:من أرسل بنفقة في سبیل الله  وأقام في بیته فله بکل درهم  سبع مائة درهم  ومن غزی بنفسه في سبیل الله  وأنفق  في وجه ذلک فله بکل درهم سبع مائة ألف درهم  ثم تلی هذه الآيه والله یضاعف لمن یشآء. (ابن ماجة  1/ 323 باب فضائل النفقة في سبیل الله)                                                                            

    دوسری روایت میں ہے کہ اللہ  کی راہ میں  نماز۔ روزہ اور ذکراللہ کا ثواب خرچ کرنے کے مقابلے میں سات سو گنا زیادہ ہو جاتا ہے  جس کے الفاظ یہ ہیں :

قال رسول اللهﷺ :ان الصلوةوالصیا م والذکر یضاعف علی النفقة في سبیل الله عز وجل بسبع و مائة ضعف. (ابو داؤد  1/ 360 باب في تضعیف الذکر في سبیل لله عز وجل )

اب پہلی حدیث کے سات لاکھ کو دوسری حدیث کے سات  سو سے ضرب دی جائے تو انچاس کروڑ بن جاتا ہےلیکن یہ بات ذہن میں رہے کہ اگرچہ اللہ تعالی کے لئے اتنا ثواب دینا بعید نہیں لیکن ثواب کی مقدار کے لئے جس طرح سے  حساب  لگایا جاتا ہے  یہ تکلف ہے۔