حضرت بلال ؓ کے شین کو سین پڑھنے اور بڑھیا کے نبی کریمﷺ پر کوڑا پھینکنے والی حدیث کی تحقیق

استفتاء

مفتی صاحب عام لوگ دو حدیثیں بیان کیا کرتے ہیں  :

1۔ حضرت بلال ؓشین کو سین پڑھا کرتے تھے تو انکو اذان پڑھنے سے روکا گیا تو سورج  طلوع نہ  ہوا ۔

2۔  ایک بڑھیا نبی کریمﷺ  پر کوڑا پھینکا کرتی تھی   ۔

تو کیا یہ دونوں  حدیثیں صحیح  ہیں  یا من گھڑت  ہیں  ؟وضاحت کردیں۔

الجواب :بسم اللہ حامداًومصلیاً

1۔یہ  بات تو درست نہیں کہ حضرت بلالؓ شین کو سین پڑھا کرتے تھے جس کی وجہ سے انہیں اذان دینے سے روکا گیا تو سورج طلوع نہ ہوا  البتہ اس سے ملتا جلتا ایک اور واقعہ ہے اور وہ یہ ہے کہ آپﷺ سحری تناول فرمارہے تھے کہ حضرت بلالؓ  نے عرض کیا یا رسول اللہ  صبح ہوگئی (یعنی سحری کا وقت ختم ہوگیا) آپﷺ سحری تناول فرماتے رہے، حضرت بلالؓ نے پھر کہا یا رسول اللہ صبح ہوگئی آپ ﷺ سحری تناول فرماتے رہے، تیسری مرتبہ حضرت بلال ؓ نے کہا یا رسول اللہ،  اللہ کی قسم صبح ہوگئی ہے آپﷺ نےا رشاد فرمایا کہ اللہ  بلال پر رحم فرمائے اگر بلال نہ ہوتے (یعنی اگر وہ قسم نہ کھاتے)  تو ہمیں امید تھی کہ ہمیں طلوع شمس (سورج نکلنے) تک (سحری کھانے کی) رخصت مل جاتی۔

2۔بوڑھی عورت کا حضورﷺ پر کوڑا پھینکنے والا واقعہ حدیث کی کسی مستند کتاب میں نہیں ملا، البتہ تفاسیر میں ابولہب کی بیوی کا واقعہ ملتا ہے کہ وہ آپﷺ کے راستے میں  کانٹے پھینکتی تھی جس پر  سورۂ لہب نازل ہوئی۔ چنانچہ الدر المنثور (6/702) میں ہے:

عن ابن زيد أن امرأة أبي لهب كانت تلقي من طريق النبي صلى الله عليه وسلم ‌الشوك فنزلت {تبت يدا أبي لهب} {وامرأته حمالة الحطب}

وفيه أيضا: عن ابن عباس رضي الله عنهما في قوله: {وامرأته حمالة الحطب} قال: كانت ‌تحمل ‌الشوك فتطرحه على طريق النبي صلى الله عليه وسلم ليعقره وأصحابه

مصنف عبدالرزاق(رقم الحدیث:7844) میں ہے:

عن حكيم بن جابر قال: جاء بلال إلى النبي صلى الله عليه وسلم ، والنبي صلى الله عليه وسلم   يتسحر، فقال: الصلاة يا رسول الله، ‌فثبت ‌كما ‌هو يأكل، ثم أتاه، فقال: الصلاة، وهو حاله، ثم أتاه الثالثة، فقال: الصلاة يا رسول الله، قد والله أصبحت، فقال النبي صلى الله عليه وسلم: “يرحم الله بلالا، لولا بلال لرجونا أن يرخص لنا حتى تطلع الشمس”

المقاصد الحسنہ (رقم الحدیث:255) میں ہے:

حَدِيث: سِينُ بِلالٍ عِنْدَ اللَّه شِينٌ، قال ابن كثير: ‌إنه ‌ليس ‌له ‌أصل، ولا يصح، وقد ترجمه غير واحد بأنه كان ندي الصوت حسنه فصيحه، وقال النبي صَلَّى اللَّهُ عَلَيْهِ وَسَلَّمَ لعبد اللَّه بن زيد صاحب الرؤيا: ألق عليه، أي على بلال، الأذان، فإنه أندى صوتا منك، ولو كانت فيه لثغة لتوفرت الدواعي على نقلها، ولعابها أهل النفاق والضلال، المجتهدين في التنقص لأهل الإسلام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم