تبلیغی جماعت میں جانے پر ایک نماز کا ثواب انچاس کروڑ کے برابر ملنے کی تحقیق

استفتاء

تبلیغی جماعت میں جانے  سے ایک نماز کا ثواب 49 کروڑ ہے اس کی کیا حقیقت ہے؟

الجواب :بسم اللہ حامداًومصلیاً

انچاس کروڑ کے برابر  ثواب کی مقدار کے بارے میں کوئی صریح حدیث نہیں البتہ دو احادیث کو پیش نظر رکھ کر اس کا حساب لگایا جاسکتا ہے۔پہلی حدیث  میں ہے کہ جو شخص اللہ کی راہ میں نکل کر خرچ کرے اس کو ایک روپے کے عوض سات لاکھ روپے کا ثواب ملے گا ۔جس کے الفاظ یہ ہیں:

عن رسول الله صلى الله عليه وسلم أنه قال: «‌من ‌أرسل ‌بنفقة في سبيل الله وأقام في بيته، فله بكل درهم سبعمائة درهم، ومن غزا بنفسه في سبيل الله، وأنفق في وجه ذلك، فله بكل درهم سبعمائة ألف درهم» ، ثم تلا هذه الآية: والله يضاعف لمن يشاء(سنن ابن ماجه ح:2761)

اور دوسری حدیث میں ہے کہ اللہ کی راہ میں نمازاور روزہ اور ذکر کا ثواب خرچ کرنے کے مقابلے میں سات سو گنا زیادہ ہوجاتا ہے۔جس کے الفاظ یہ ہیں:

قال رسول الله -صلى الله عليه وسلم إن الصلاة والصيام والذكر ‌يضاعف ‌على ‌النفقة في سبيل الله بسبع مئة ضعف(سنن ابی داؤد ح:2498)

اب پہلی حدیث کے سات لاکھ کو دوسری حدیث کے سات سو سے ضرب دی جائے تو انچاس کروڑ بن جاتا ہے۔

نوٹ:یہ ثواب اللہ کے راہ  میں نکلنے والے ہر فرد کے لیے ہے چاہے اس کا نکلنا تبلیغ دین کے لیے ہو یا حج ،جہاد،تعلیم دین کے لیے ہو۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم