وفات کی اطلاع کے وقت کی دعا "والی حدیث کا حوالہ درکار ہے

استفتاء

حضرت ابن عباس رضی اللہ عنہ سے روایت ہے کہ رسول اللہ ﷺ نے فرمایا موت سے فطرتا گھبراہٹ ہوتی ہے ، پس جب تم میں سے کسی کو اپنے مسلمان بھائی کی وفات کی اطلاع پہنچے تو وہ یہ دعا پڑھے :

 "إنّا لله وإنّا إليه راجعون وإنّا إلى ربّنا لمنقلبون اللّهم اكتبه عندك من المحسنين واجعل كتابه في عليّين واخلفه في أهله في الغابرين،ولا تحرمنا أجره ، ولا تفتنّا بعده "

ترجمہ  : ہم سب اللہ کے ہیں اور اللہ ہی کی طرف لوٹ کر جانا ہے اور ہم اپنے پروردگار  کی طرف پلٹنے والے ہیں ۔ اے اللہ ! آپ اسے(میت کو) اپنے ہاں نیکوکاروں  میں لکھ لیجئے اور اس کا اعمال نامہ علیین (جہاں نیک لوگوں کے اعمال نامے ہوتے ہیں ) میں رکھ دیجئے اور اس کے پس ماندگان میں اس کے نائب  ہو جائیے اور ہمیں اس (کی موت پر صبرکرنے) کے اجر سے محروم نہ کیجئے اور ہمیں اس کے بعد آزمائش میں نہ ڈالیے۔

اس حدیث کا حوالہ نمبر درکار ہے ؟

الجواب :بسم اللہ حامداًومصلیاً

مذکورہ روایت  ابو بکر ابن السنی ؒ نےاپنی کتاب ” عمل الیوم واللیلۃ”(ص 264رقم الحدیث  561)میں  نقل کی ہےاور کچھ معمولی تبدیلی کے ساتھ یہی روایت المعجم الکبیر للطبرانی (ج3ص206رقم الحدیث 12299) میں بھی ہے اورالمعجم الکبیر کے الفاظ یہ ہیں  :

عن ابن عباس رضی اللہ عنہ قال: قال النبي صلى الله عليه وسلم:إن للموت فزعا , فإذا أتى أحدكم وفاة أخيه , فليقل: إنا لله وإنا إليه راجعون ,وإنا إلى ربنا لمنقلبون, اللّهم اكتبه في المحسنين ,واجعل كتابه في علّيين , واخلف عقبه في الآخرين , اللهم لا تحرمنا أجره , ولا تفتنّا بعده.۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ فقط واللہ تعالیٰ اعلم