ایک حدیث کی تحقیق

استفتاء

کھانے سے پہلے اگر بسم اللہ پڑھنا بھول جائے  تو جو دعا پڑھنا مسنون ہے اسکے الفاظ “بسم اللّٰہ اوَّلہٗ وآخرہٗ” احادیث مبارکہ میں ملتے ہیں کیا اسکے علاوہ بھی کوئی الفاظ مسنون ہیں ؟جیسا کہ “بسم اللہ فی اولہٖ وآخرہٖ” کیا یہ الفاظ بھی کسی حدیث مبارکہ سے ثابت ہیں ؟

الجواب :بسم اللہ حامداًومصلیاً

یہ دونوں دعائیں احادیث مبارکہ سے ثابت ہیں ۔

چنانچہ سنن ابی داؤد(رقم الحدیث:3768)میں ہے:

عن عمه أمية بن مخشي – وكان من أصحاب رسول الله – صلى الله عليه وسلم – قال: كان رسول الله – صلى الله عليه وسلم – جالسا ورجل يأكل، فلم يسم حتى لم يبق من طعامه إلا لقمة، فلما رفعها إلى فيه قال: باسم الله أوله وآخره، فضحك النبي -صلى الله عليه وسلم- ثم قال: ‌ما ‌زال ‌الشيطان يأكل معه، فلما ذكر اسم الله استقی ما في بطنه

ترجمہ: حضرت امیہ  بن مخشی ؓ روایت کرتے ہیں  اور یہ رسول اللہﷺ کے صحابی ہیں فرماتے ہیں کہ رسول اللہ ﷺ تشریف فرما تھے اور ایک آدمی کھانا کھا رہا تھا بغیر بسم اللہ پڑھے یہاں تک کہ اس کے کھانے میں ایک لقمہ باقی رہ گیا  تو جب اس شخص نے اس  لقمےکو اپنے منہ کی طرف اٹھایا تو کہا :بسم اللہ اولہ وآخرہ تو نبیﷺمسکرادیئے پھر فرمایا ابتداءہی سے شیطان اس کے ساتھ کھاتا رہا جب اس نے اللہ عزوجل کانام لیا تو جو اسکے پیٹ میں تھا اس نے قے کردیا۔

سنن ترمذی (رقم الحدیث:1858) میں ہے:

عن عائشة قالت: قال رسول الله صلى الله عليه وسلم: ” ‌إذا ‌أكل ‌أحدكم ‌طعاما فليقل: بسم الله، فإن نسي في أوله فليقل: بسم الله في أوله وآخره “

ترجمہ: حضرت عائشہؓ سے مروی ہے آپﷺ نے ارشاد فرمایا جب کوئی تم میں سے کھانا کھائے تو چاہیے کہ وہ بسم اللہ پڑھے اگر شروع میں بھول جائے تو چاہیے کہ وہ یوں کہہ لے “بسم اللہ فی اولہ وآخرہ”

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم