درود شریف پڑھنے والے کو ہاتھ سے پکڑ کر جنت میں لے جانے سے متعلق حدیث کی تحقیق

استفتاء

آپ صلی اللہ علیہ وسلم نے فرمایا کوئی شخص درود شریف پڑھے یا دوسروں تک پہنچائے کل قیامت کے دن میں اسے ہاتھ سے پکڑ کر جنت میں لے کر جاؤں گا۔

کیا یہ حدیث صحیح ہے؟

الجواب :بسم اللہ حامداًومصلیاً

ہاتھ سے پکڑ کر جنت میں لےجانے کے الفاظ توہمیں حدیث میں نہیں ملے البتہ درود شریف پڑھنے والے شخص کی سفارش کرنے کے الفاظ حدیث سے ثابت ہیں۔ نیز سفارش بھی پڑھنے والے کے بارے میں منقول ہے دوسروں  تک پہنچانے والے کے بارے میں ہمیں نہیں ملی۔

الترغیب فی فضائل الاعمال ، لعمر بن احمد المعروف بان شاہین، ت:۳۸۵ھ(ص:12) ميں  ہے:

حدثنا عمر، نا عبد الله بن سليمان بن الأشعث، أنا علي بن الحسين المكتب، أنا إسماعيل بن يحيى بن عبد الله التيمي، أنا فطر بن خليفة، عن أبي الطفيل، عن أبي بكر، قال: سمعت رسول الله صلى الله عليه وسلم يقول: «‌من ‌صلى ‌علي ‌كنت شفيعه يوم القيامة»

ترجمہ: حضرت ابوبکر رضی اللہ تعالی عنہ فرماتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا جس نے مجھ پر درود پڑھا قیامت کے دن میں اس کا سفارشی ہوں گا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم