عید کے دن تین سو مرتبہ "سبحن الله وبحمده” پڑھنے کی تحقیق

استفتاء

فوت شدگان کو عیدی دیں!

جو شخص عید کے دن تین سو مرتبہ "سبحن الله وبحمده”پڑھے اور فوت شدگان کی ارواح کو اس کا ایصال ثواب کرے تو ہر مسلمان کی قبر میں ایک ہزار انوار داخل ہوتے ہیں اور جب وہ پڑھنے والا خود مرے گا ، اللہ تعالیٰ اس کی قبر میں بھی ایک ہزار  انوار داخل فرمادے گا۔

کیا یہ بات درست ہے؟

الجواب :بسم اللہ حامداًومصلیاً

مذکورہ روايت  نزہۃ المجالس للصفوری اور مکاشفۃ القلوب للغزالی میں بغیر سند کے مذکور ہے اور تلاش کے باوجود ذخیرہ کتب احادیث میں ہمیں یہ روایت سند کے ساتھ نہیں ملی لہٰذا اس کے متعلق کچھ نہیں کہا جاسکتا، نیز سبحن الله وبحمده کے فضائل بہت سی احادیث میں وارد ہیں اس لیے کسی دن کو خاص کیے بغیر اسے پڑھنا اور ایصال ثواب کرنا درست ہے۔

مکاشفۃ القلوب (باب:104) میں ہے:

قال صلى الله عليه وسلم من قال سبحان الله وبحمده يوم العيد ثلثمأئة مرة وأهداها لأموات المسلمين دخل فى كل قبر ألف نور ويجعل الله تعالى في قبره إذا مات ألف نور.

صحیح بخاری (رقم الحدیث:7563) میں ہے:

عن ‌أبي هريرة رضي الله عنه قال: قال النبي صلى الله عليه وسلم: «‌كلمتان حبيبتان إلى الرحمن، خفيفتان على اللسان، ثقيلتان في الميزان: سبحان الله وبحمده، سبحان الله العظيم.

مرقاۃ المفاتیح (2/755) ميں  ہے:

قال الطيبي: وفيه أن من أصر على أمر مندوب، ‌وجعله ‌عزما، ولم يعمل بالرخصة فقد أصاب منه الشيطان من الإضلال فكيف من أصر على بدعة أو منكر؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم