گناہ کرنے سے دل پر سیاہ نقطہ لگنےکی تحقیق

استفتاء

’’جب انسان گناہ کرتا ہے تو اس کے دل پر کالا نقطہ لگ جاتا ہے ،پھر ایک وقت آتا ہے اس کا پورا دل کالا ہو جاتا ہے اور اس وقت پھر اس کو گناہ گناہ نہیں لگتا ہے‘‘

کیا یہ بات ایسے ہی ہے؟

الجواب :بسم اللہ حامداًومصلیاً

یہ بات درست ہے مکمل حدیث یوں  ہے:

ان المؤمن اذا اذنب كانت نقطة سوداء في قلبه فان تاب واستغفر صقل قلبه فان زاد زادت حتى يعلق بها قلبه فذلك الران الذي ذكره الله في كتابه( كلا بل ران على قلوبهم ما كانوا يكسبون)

(المستدرك للحاكم رقم الحديث: 3963)

تفسیر عثمانی میں آیت( کلابل ران على قلوبهم ما كانوا يكسبون) کی تفسیر میں ہے :

’’اصل یہ ہے کہ گناہوں کی کثرت سے ان کے دلوں پر زنگ چڑھ گئے ہیں ،اس لیے حقائق صحیحہ کا انعکاس ان میں نہیں ہوتا۔حدیث میں فرمایا ہے کہ جب بندہ کوئی گناہ کرتا ہے تو ایک سیاہ نقطہ اس کے دل پر لگ جاتا ہے ،اگر توبہ کر لی تو مٹ گیا ورنہ جوں جوں گناہ کرتا رہے گاوہ نقطہ بڑھتا اور پھیلتا رہے گا تاآنکہ اس  کا قلب(دل)بالکل کالاسیاہ ہو جائے گا کہ حق و باطل کی تمیز باقی نہ رہے‘‘

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی ا علم