ہاتھ پرلکھے ہوئے نام کو مٹانا ضروری نہیں بس توبہ کرنا کافی ہے

استفتاء

کیا فرماتے ہیں مفتیان کرام اس مسئلہ کے بارے میں کہ کافی سال پہلے جب دین سے بالکل وابستگی نہیں تھی اور مجھے حلال حرام کے بارے میں بھی کچھ خاص علم نہیں تھا تو میں نے اپنے بازو پر کہنی سے اوپر اپنے نام کے سپیلنگ لکھوا لیے تھے جب معلوم ہوا کہ یہ جائز نہیں تو پکی توبہ کر لی اور خوب الله سے معافی مانگی بدن کا وہ حصہ میں کبھی بھی ننگا نہیں کرتا لیکن وہ حروف ابھی بھی میرے بازو پر ہیں تو کیا گوشت کے اس حصے کو کٹوانا پڑے گا یا میری پکی  توبہ کر لینا کافی ہے؟

الجواب :بسم اللہ حامداًومصلیاً

مذکورہ صورت میں اگر  اس نام کوآسانی سے مٹانا ممکن ہو تو اس کو زائل کر دے ورنہ پکی توبہ کر لینا کافی ہے،جسم کے اس حصے کو کاٹنا ضروری نہیں۔

فتح الباری 11/568 میں ہے:

ان خاف منه تلفا او فوات منفعة عضو فيجوز ابقاؤه وتكفى التوبة فى سقوط الاثم

شامی 1/591 میں ہے:

 يستفاد مما مر حكم الوشم في  نحو اليد وهو أنه كالاختضاب أو الصبغ بالمتنجس لأنه إذا غرزت اليد أو الشفة مثلا بإبرة ثم حشي محلها بكحل أو نيلة ليخضر تنجس الكحل بالدم فإذا جمد الدم والتأم الجرح بقي محله أخضر فإذا غسل طهر لأنه أثر يشق زواله لأنه لایزول إلا بسلخ الجلد أو جرحه فإذا كان لا يكلف بإزالة الأثر الذي يزول بماء حار أو صابون فعدم التكليف هنا أولى…