مجبوری کی حالت میں حاملہ عورت کا کسی عورت سے زیر ناف بال صاف کروانا

استفتاء

اگر حاملہ عورت سے زیر ناف  کی بالوں کی صفائی کرنا مشکل ہوجائے تو وہ کسی دوسری عورت سے مدد لے سکتی ہے ؟

الجواب :بسم اللہ حامداًومصلیاً

جہاں تک ممکن ہو تو وہ  یہ  کا م از خود کرے۔ اور اگر ممکن نہ ہوتو کسی دوسری عورت  سےبھی مدد لے سکتی ہے تاہم وہ عورت  دیکھنے اور مس کرنے میں جہاں تک ہوسکے احتیاط کرے ۔

شامی (7/115) میں ہے:"لا بأس للحمامي أن يطلي عورة غيره بالنورة انتهى  لكن قال في الهندية بعد أن نقل عن التاترخانية أن أبا حنيفة كان لا يرى بأسا بنظر الحمامي إلى عورة الرجل ونقل أنه ما يباح من النظر للرجل من الرجل يباح المس ونقله عن الهداية ونقل ما نقلناه لكن قيده بما إذا كان يغص بصره ونقل عن الفقيه أبي الليث أن هذا في حالة الضرورة لا في غيرها وقال وينبغي لكل واحد أن يتولى عانته بيده إذا تنور كما في المحيط فليحفظ  أقول ومعنى ينبغي هنا الوجوب كما يظهر فتأمل "فتاوی محمودیہ (19/451) میں ہے:سوال: ایک شخص معمر بیمار ہوجاتا ہے عرصہ ۶؍۷؍ماہ بیمار رہتا ہے پورا صاحب فراش ہے کہ حرکت کی بھی طاقت نہیں اس کی اہلیہ کو بھی ضعف بصر ہے کیا اس کا بیٹا زیر ناف بال استرے سے صاف کرسکتا ہے یا نہیں؟

الجواب: بدرجہ مجبوری جائز ہے، مس کرنے اور دیکھنے سے حتی الوسع احتیاط کرے۔                          

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم