حسنین کریمین رضی اللہ عنھا کا جنت کے سردار ہونے کا مطلب

استفتاء

حضرات حسنین کریمین جنت  کے سردار ہیں ۔ سردار ہونے کا  کیا مطلب ہے ؟اور سردار ہونے کے کیا فرائض ہیں؟

وضاحت مطلوب ہے: آپ کے ذہن میں اس حولے سے کوئی خاص اشکال یا الجھن ہے تو اسے ذراواضح کریں تاکہ جواب  میں اس با ت کو ملحوظ رکھاجاسکے۔

جواب  وضاحت:کچھ زیادہ نہیں بس جیسے ہمارے پاکستان میں سردار ہوتے ہیں اور باقی لوگوں پر حکمرانی کرتے ہیں ۔کیا یہ مطلب ہے؟

الجواب :بسم اللہ حامداًومصلیاً

آپ کی ذکرکردہ حدیث کا یہ ترجمہ  صحیح نہیں کہ حضرات حسنین کریمین جنت کے سردار ہیں بلکہ صحیح ترجمہ یہ ہے کہ حضرات حسنین  کر یمین جنتی نوجوانوں  کے سردار ہیں  ،اور اس کا مطلب یہ ہے کہ جتنےجنتی  لوگ بھی جوانی  میں  اللہ کے راستے میں شہید ہوئےہیں یہ دونوں حضرات ان سب سے زیادہ فضیلت اور شرافت  والے ہیں ۔یہ مطلب نہیں کہ جیسا دنیا کے سردار باقی لوگوں پر حکمرانی کرتے ہیں ایسے ہی یہ حضرات جنت میں باقی جنتیوں پر حکومت کریں گے ۔

مشکوۃ المصابیح (2/578) میں ہے:

"عن أبي سعيد الخدري رضي الله عنه قال : قال رسول الله صلى الله عليه و سلم :الحسن و الحسين سيدا شباب أهل الجنة "۔

چنانچہ ابن منطورؒ سید کا معنی کرتے ہوئے لکھتے ہیں :الذي يفوق  في الخير(لسان العرب)

اور ملاعلی قاری ؒ اس کی تشریح کرتے ہوئےلکھتے ہیں :

قال المظهر يعني هما أفضل من مات شابا في سبيل الله من أصحاب الجنة ولم يرد به سن الشباب لأنهما ماتا وقد كهلا بل ما يفعله الشباب من المروة كما يقال فلان فتى وإن كان شيخا يشير إلى مروته وفتوته۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم