کیا چالیس دن تک گوشت نہ کھانے سے انسان بد اخلاق ہوجاتا ہے؟

استفتاء

رسول الله ﷺ نے فرمایا: گوشت کھانے سے جسم پر گوشت بڑھتا ہے اور جو شخص چالیس دن تک گوشت نہ کھائے وہ بد اخلاق ہوجاتا ہے۔

اس حدیث کی تصدیق کرنی ہے کہ درست ہے یا نہیں؟

الجواب :بسم اللہ حامداًومصلیاً

کافی تلاش کے باوجود ذخیرہ کتب احادیث میں یہ روایت نہیں ملی البتہ امام غزالیؒ نے یہ جملہ حضرت علیؓ کی طرف منسوب کرکے نقل کیا ہے کہ “جس نے  چالیس دن  تک گوشت کھانا چھوڑ دیا اس کے اخلاق برے ہوجائیں گے اور جو شخص چالیس دن تک گوشت کھائے اس کا دل سخت ہوجائے گا”لیکن اس قول کی بھی ہمیں کہیں سند نہیں ملی۔

ملفوظات حکیم الامت (2/187) میں ہے:

ایک صاحب نے سوال کیا کہ کیا حدیث شریف میں یہ ہے کہ چالیس دن مسلسل گوشت کھانے سے دل پر سختی آجاتی ہے فرمایا کہ حدیث شریف میں تو نہیں لیکن بعض بزرگوں کا قول ہے اور یہ بھی بزرگوں کا قول ہے کہ مسلسل نہ  کھانے سے بھی دل سخت ہوجاتا ہے۔

احیاء علوم الدین(3/95)میں ہے:

فينبغي ‌أن ‌لا ‌يواظب على أكل اللحم قال علي كرم الله وجهه: من ترك اللحم أربعين يوما ساء خلقه ومن داوم عليه أربعين يوما قسا قلبه

تفسیر المؤطا للقنازعی (2/759) میں ہے:

قال بعض الفقهاء: إدمان ‌أكل ‌اللحم ‌يقسي القلب، وإغباب أكله هو الصواب

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم