مسجد کی دکانوں کے کرایہ میں بیوہ کو رعایت دینے کا حکم

استفتاء

کیا فرماتے ہیں مفتیانِ کرام اس مسئلہ کے بارے میں کہ ایک مسجد ہےاور اسکے دروازے کے دائیں بائیں مسجد کی چار عدد دکانیں ہیں اور وہ کرایہ پر دی ہوئی ہیں ان میں سے ایک دکان میں بیوہ ہے اور باقیوں میں دیگر افراد ہیں اور ہر ماہ کرایہ دے رہے ہیں ایک دکان میں ایک بزرگ ہیں جو کریانہ وغیرہ کا کام کرتے ہیں ان کا اچانک ایکسیڈنٹ ہو گیا تھا جس کی وجہ سے وہ  دو ماہ تک دکان پر ٹائم نہیں دے پائے تھےمگردو ماہ بعد وہ تندرست ہوکر پھر دکان چلا رہے ہیں آیا  انتظامیہ والے آپس میں مشاورت کر کے اس بناء پر کہ  ان کاایکسیڈنٹ ہوگیا تھا  ان کا  دو ماہ کا کرایہ معاف کردیں یعنی نہ لیں اور باقی بیوہ سمیت سب سے کرایہ لیں تو  ایسا کرنا شرعاً کیسا ہے؟اور مزید وضاحت عطا فرما دیجئے کہ کیا بیوہ کو کرایہ میں رعایت دے سکتے ہیں؟ مثلاً چار میں سے ہر ایک دوکاندار سے ماہانہ 5000 کرایہ لیتے ہیں اور بیوہ کا کرایہ کم کردیں ایسا کرنا شرعاً کیسا ہے؟

وضاحت مطلوب ہے:جس شخص نے دکانیں مسجد کے لیے وقف کی ہیں کیا اس نے وقف کرتے وقت فقراء ،غرباء کو رعایت دینے کا کہا تھا یا رعایت دینے کی کوئی بات نہیں کی تھی؟

جواب وضاحت:نہیں انہوں نے مسجد کے لیے دی ہیں دکانیں، کرایہ مسجد کے لیے وقف ہے مزید وضاحت نہیں کی۔

الجواب :بسم اللہ حامداًومصلیاً

مذکورہ صورت میں انتطامیہ والوں کا  بزرگ  دکان دار کا کرایہ  معاف کرنا یا بیوہ کا  کرایہ کم کرنا جائز نہیں ان سے  پورا کرایہ وصول کرنا ضروری ہے۔

توجیہ: متولی وقف کا نگران ہوتا ہے مالک نہیں ہوتا لہٰذا وہ وقف کے منافع بغیر اجرت کے کسی کو نہیں دے سکتا، نیز متولی کے لیے وقف کی مملوکہ د کانوں کو اجرت مثل سے کم پر دینا بھی  جائز نہیں۔

فتاویٰ قاضیخان (4/233) میں ہے:

ولو اشترى القيم بغلة المسجد ثوبا ودفع الى المساكين لا يجوز

فتاویٰ ہندیہ(4/183) میں ہے:

ولاتجوز اجارة الوقف الا باجر المثل

فتاویٰ ہندیہ(4/233) میں ہے:

متولي المسجد ليس له أن يحمل  سراج المسجد الى بيته وله أن يحمله من البيت الى المسجد.

فتاویٰ محمودیہ(15/81) میں ہے:

سوال: مسجد کے متولی اما م یا مؤذن  وغیرہ کو مسجد کی بقایا رقم جبکہ مجبوری ہو ادا نہ کرسکتا ہو معاف کرسکتے ہیں؟

جواب: اس کو معاف کرنے کا حق کسی کو نہیں جو لوگ معاف کرنا چاہتے ہیں وہ چندہ کرکے اس کی طرف  سے ادا کریں۔

فتاویٰ محمودیہ(15/75) میں ہے:

سوال: جن مساجد کے پاس  کافی روپیہ جمع ہو وہ غرباء کو قرض دے کر ان کی حالت  سدھار سکتے ہیں؟

جواب: اس کی اجازت نہیں ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم