مسجد کی جگہ میں پلانٹ لگانا

استفتاء

مفتیان کرام اس مسئلہ کے بارے میں کیا فرماتے کہ ہمارے محلہ کی مسجد کے ایک کونہ سے محلے دار ایک مرلہ جگہ مانگتے ہیں تاکہ وہاں منرل واٹر کا پلانٹ شہر کی بلدیہ کی طرف سے لگایا جائے اور وہ عوام الناس کے استعمال کے لیے ہوگا اور اس کا دروازہ گلی میں ہوگا، مسجد کو پانی کے استعمال کی اجازت ہوگی جبکہ وہ جگہ مسجد کے نام رجسٹری ہے اور مسجد کی چار دیواری کے اندر ہے لیکن ابھی تک وہاں نماز نہیں پڑھی۔ کیا وہ جگہ اس مقصد کے لیے دی جاسکتی ہے یا نہیں؟

الجواب :بسم اللہ حامداًومصلیاً

اگر وہ جگہ نماز پڑھنے کی نہیں ہے تو اس کو مسجد کے وقف میں باقی رکھتے ہوئے اس میں عارضی طور پر پلانٹ لگایا جاسکتا ہے۔ لیکن اس میں دو باتوں کو یقینی بنانا ضروری ہے:

۱۔ کوئی موزوں متبادل جگہ پلانٹ لگانے کی نہ ہو۔

۲۔ وہ جگہ مسجد کے وقف کے طور پر رہے گی۔ کل کو بلدیہ اس پر اپنا حق نہ جمائے گی۔ فقط و اللہ تعالیٰ اعلم