محض نیت کرنے سے نذر متحقق نہیں ہوتی

استفتاء

السلام علیکم ورحمۃ الله وبرکاتہ

ایک شخص جب بھی اس پر کوئی سخت حالات یامصیبت آتی ہے تو نذر مانتا ہے صدقے کی اور کہتا ہے میں اتنا صدقہ کروں گا اگر یہ مصیبت مجھ سے ٹل گئی جب کہ اس کے پاس کوئی مال نہیں ہے لیکن وہ پکی اور اخلاص سے نیت کرتا ہے کہ جب بھی میرے پاس مال آئے گا میں یہ صدقہ کروں گا۔ اسی طرح چار ،پانچ سال سے اس پر کوئی مصیبت آتی رہتی ہے اور وہ نذر کی نیت کرتا رہتا ہے، اسی طرح اس پر چھ سات لاکھ روپے صدقہ جمع ہو جاتا ہے اور وہ ابھی تک اس کے قابل نہیں ہے کہ وہ ادا کردے لیکن اس کی پکی نیت ہے کہ جب بھی میرے پاس مال آیا میں صدقہ کروں گا ۔اس شخص کے بارے میں کیا حکم ہے؟ کیا آئندہ کے لئے وہ ایسے صدقوں کی نیت کر سکتا ہے؟

وضاحت مطلوب ہے: نذر کی نیت کتنی دفعہ کی اور نظر مانگتے وقت الفاظ کیا بولے تھے؟

جواب وضاحت: الفاظ نہیں بولے بس ویسے دل میں نیت کی لاتعداد موقع پر۔

الجواب :بسم اللہ حامداًومصلیاً

محض دل میں نیت کرنے سے نذر منعقد نہیں ہوتی، جب تک کہ زبان سے نذر کے الفاظ نہ کہے جائیں۔ مذکورہ صورت میں چونکہ اس آدمی نے محض دل میں نیت کی ہے، زبان سے نذر کے الفاظ نہیں بولے ،لہذا اس آدمی کے ذمے کچھ بھی دینا ضروری نہیں۔

احکام القرآن لابن عربی1/352 میں ہے:

المسألةالاولى فى حقيقةالنذروھوالتزام الفعل بالقول مما يكون طاعة لله من الاعمال