وضو کے درمیان دعا پڑھنے سے متعلق تحقیق

استفتاء

وضو کے درمیان یہ دعا” سبحانک الاحمد وبحمدک استغفرک و اتوب الیک ” پڑهنے سے اللہ مغفرت فرماکر عرش کے نیچے لٹکادیتا  ہے اسکے بعد کوئی  گناہ اسے مٹانہیں سکتا  ہے۔

کیا قرآن وحدیث سے اس بات کا ثبوت ہے؟

الجواب :بسم اللہ حامداًومصلیاً

آپ کی ذکر کردہ دعا اور فضیلت  تو ہمیں حدیث کی کتب میں نہیں ملی البتہ وضو کے بعد کی ایک دعا اور اس کی فضیلت آپ کی ذکر  کردہ دعا اور فضیلت کے قریب قریب ہے جس کے الفاظ وترجمہ درج ذیل ہے۔

الترغیب والترہیب (2/376) میں ہے:

عن أبي سعيد الخدري رضي الله عنه عن النبي صلى الله عليه وسلم قال……….. ومن توضأ ‌ثم ‌قال ‌سبحانك اللهم وبحمدك لا إله إلا أنت أستغفرك وأتوب إليك كتب في رق ثم طبع بطابع فلم يكسر إلى يوم القيامة

ترجمہ: حضرت ابوسعید خدریؓ سے مروی ہے کہ جناب رسول اللہ ﷺ نے ارشاد فرمایا : .. … … ….  جس نے وضو کیا پھر یہ دعا پڑھی “‌سبحانك اللهم وبحمدك لا إله إلا أنت أستغفرك وأتوب إليك ” تو ان کلمات  کو کاغذ میں لکھ کر اس پر مہر لگا دی جاتی ہے اسے قیامت کے دن تک نہیں توڑا جاسکتا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم