زندگی میں ساری جائیداد بچیوں کے نام کرنا جبکہ کوئی بیٹا نہ ہو

استفتاء

مفتی صاحب!میرے ماموں  زاد بھائی نے چند دن پہلے جب ڈاکٹروں نے انہیں بتایا کہ آپ کے پاس وقت بہت کم ہے تو انہوں نے ساری زمین اپنی بچیوں کے نام لگادی جبکہ مرحوم کے بھائی اب  یہ سوال کر رہے ہیں کہ (1)کیا زندگی میں باپ2/3 حصہ کے بجائے  اپنی ساری وراثتی جائیداد اپنی بچیوں کے نام لگا سکتا ہے ،جبکہ بیٹا کوئی نہ ہو۔(2)کیا اس جائیداد میں 1/3بہن  بھائیوں کا حق نہیں بنتا تھا جس طرح مرنےکے بعد بنتاہے۔(3)بیوی نے اپنا حق لینے سے انکار کردیا تھا کہ میرے پاس والدین کی وراثتی زمین موجود ہے اس لیے ساری جائیداد بچیوں کے نام لگادی۔(4)اب بچیوں کا باپ وفات پا گیاہے اور اس کے نام مکان اور جانوروں کی حویلی بقایا ہے مہربانی فرما کر بتائیں کہ اس کی تقسیم کس طرح ہوگی؟ورثاء میں متوفی کی ایک بیوہ،تین بیٹیاں،دو بھائی، اور دو بہنیں زندہ ہیں والدین وغیرہ وفات پاگئے ہیں۔

وضاحت مطلوب ہے کہ:

زمین بچیوں کے نام کیسے لگائی،رجسٹری ان کے نام کی یا زبانی؟قبضہ دیا یانہیں؟

جوابِ وضاحت:(فون پر مرنے والے کی بیوی نعیم نےمذکورہ بیان کی تصدیق کی) اور لی گئی وضاحت کا جواب دیا کہ                          باقاعدہ نام رجسٹری ہے مگر قبضہ نہیں کرایا تھا،اور یہ کہ زندگی میں کبھی بھی جائیداد اپنی بیٹیوں کو دینے کی بات نہیں کی تھی۔

الجواب :بسم اللہ حامداًومصلیاً

(1) والد مرحوم کا مرض الوفات کے دوران  اپنی ساری زمین اپنی بچیوں کے نام کر دینا ظاہراً ہبہ ہے اور معنًی وصیت ہے، چونکہ مذکورہ  صورت  میں وارث یعنی بیٹیوں کے لیےوصیت ہے اس لیے یہ وصیت ورثاء کی رضا مندی پر موقوف ہے۔اگر وہ اس پر راضی نہیں تو زمین  تمام ورثاء میں تقسیم ہوگی۔

(2)اس میں سے بہن بھائیوں کو بھی حصہ ملے گا۔

(3)بیوی نے اس وقت اگرچہ اپنا حصہ لینے سے انکار کردیا تھا مگر اب  وہ اپنا حصہ لینا چاہتی ہو تو  اس کو بھی حصہ ملے گا۔

(4)مذکورہ صورت میں کل  ترکہ کے144 حصے کیے جائیں گے جس میں سے 18حصے بیوی کو ،ہر بیٹی کو 32حصے ،اورہر بھائی کو 10حصے  جبکہ ہر بہن کو 5حصے ملیں گے۔ صورت تقسیم یہ ہے:

24 x 6 = 144                                                                                                                                                                                                                                                                                                                                                                                                                                                                                                    

شامی(10/365) میں ہے:کتاب الوصایا……(ولالواثه) أي الوارث وقت الموت…. (إلابإجازةورثته)لقولهِ عليه الصلاة والسلام «لا وصية لوارث الا أن يجيزها الورثة».فتاوی ہندیہ(7/371) میں ہے:قال فی الاصل:ولا تجوز هبة المریض ولا صدقته الا مقبوضة فاذا قبضت جازت من الثلث واذا مات الواهب قبل التسلیم بطلت یجب ان یعلم بان هبة المریض هبة عقدا ولیست بوصية واعتبارها من الثلث ماکانت لانها وصية معنی لان حق الورثة یتعلق بمال المریض و قد تبرع بالهبة فيلزم تبرعه بقدر ما جعل الشرع له و هو الثلث.۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم