عدت کے دوران رجوع کرنا

استفتاء

عرض ہے کہ میری بیوی مورخہ 7اپریل 2009 کو بوجہ ناراضگی اپنے میکے چلی گئی ، جس کی وجہ  اس کے والدین کی بےجا مداخلت تھے، میں نے ہر ممکن کوشش کی مگر اس کے ماں اور باپ میری بات ماننے پر تیار نہ ہوئے۔ میں نے اس کو تنبیہ کرنے کی نیت سے مورخہ 26 جون کو طلاق اول کا نوٹس بھجوا دیا، مگر میری نیت اس کو طلاق دینے کی نہ تھی جس کا ثبوت یہ ہے کہ میں نے نوٹس کی کاپی یونین کونسل نہ بھجوائی اور نہ ہی اپنے الفاظ سے اس کا اقرار کیا۔ میں اس کے بعدا ن سے رابطہ کی کوشش کرتارہا مگر ان لوگوں نےمیری بیوی کا نمبر بدل دیا اور اپنا گھر بھی تبدیل کردیا۔جناب والا اس دوران میں عمرہ ادا کرنے مکہ مکرمہ گیا اوروہاں بھی مستقل خدا سے یہی مانگا کہ میری  بیوی میرے پاس آجائے اور میرا گھر بسارہے۔جب میں مورخہ 10 اگست کو واپس آیا تو میں نے اس سے رابطہ کرنے کی کوشش کی مگر اس کے رشتہ داروں نے کوئی اطلاع نہ دی میں نے اپنے خاندان کے سامنے مورخہ 14 اگست کو یہ اقرار کیا کہ میں اپنی بیوی سے بے حد پیار کرتاہوں اور اس سے رجوع کرتے ہوئے گھر بسانا چاہتاہوں، میری دانست کے مطابق وہ بھی مجھ سے محبت کرتی ہے اور اس نے میری سالگرہ کے دن مجھے ای میل بھیجا جس کے جواب میں نے بھی اس کو کئی ای  میل کیے ۔ بالآخر مجھے اپنے رشتہ داروں کی وساطت سے مورخہ 19 ستمبر کو اس کے گھر کا ایڈریس مل گیا اور میں عیدکے دن مورخہ 21 ستمبر کو اس کے بھائی سے بات چیت کے بعد اس کے گھر گیا مگر اس کے  والد اور چھوٹے بھائی نے مجھے اندرداخل نہ ہونے دیا اور نہ ہی میری بیوی کو میرے سامنے آنے دیا، وہ کہتے ہیں کہ طلاق ہوچکی ہے اور میں اپنی بیوی سے ملنے کا حقدار نہیں ہوں۔ جناب والا میں اپنی بیوی سے بے حد محبت کرتاہوں اور اس کو حاصل کرنے کے لیے قانون کا سہارا لینا چاہتاہوں۔ براہ مہربانی مجھے تحریری طور پر اس کا جواب دیا جائے کہ آیا وہ میر ی شرعی بیوی ہے یا نہیں؟

الجواب :بسم اللہ حامداًومصلیاً

مذکورہ صورت میں ایک طلاق واقع ہوچکی ہے،لہذا اگر 23 جو ن سے 14 اگست تک عورت کو 3حیض نہیں آئے تھے  تو 14 اگست کو رجوع کرلینے کی وجہ سے عورت بدستور اپنے شوہر کے نکاح میں ہے ۔ لیکن آئندہ شوہر کو صرف  دو طلاقوں کا حق حاصل ہے۔