فرض نمازوں میں ایک رکعت میں دو سورتیں پڑھنے کا حکم

استفتاء

کیا فرض نمازوں میں ایک رکعت میں دو سورتیں پڑھنا مکروہ تنزیہی ہے؟

الجواب :بسم اللہ حامداًومصلیاً

فرض نمازوں میں ایک رکعت میں دو سورتیں پڑھنا مکروہ تنزیہی ہے۔

حاشیۃ ابن عابدین (330/2) میں ہے:

أما في ركعة فيكره الجمع بين سورتين بينهما سور أو سورة فتح وفي التاترخانية إذا جمع بين سورتين في ركعة رأيت في موضع أنه لا بأس به  وذكر شيخ الإسلام لا ينبغي له أن يفعل على ما هو ظاهر الرواية ا هـ  وفي شرح المنية الأولى أن لا يفعل في الفرض ولو فعل لا يكره إلا أن يترك بينها سورة أو أكثر

فتاویٰ ہندیہ (152/1) میں  ہے:

وإذا جمع بين سورتين بينهما سور أو سورة واحدة في ركعة واحدة يكره وأما في ركعتين إن كان بينهما سور لا يكره

فتاویٰ دارالعلوم دیوبند (183/2) میں ہے:

سوال: عشاء یا صبح کی نماز میں امام ایک رکعت میں دو سورتیں پڑھے تو کچھ کراہت تو نماز میں نہیں آئی؟

جواب: ایک رکعت میں دو سورتین پڑھنا خلاف اولیٰ ہے۔ نماز ہوجاتی ہے اور خلاف اولیٰ سے مراد کراہت تنزیہ ہے

قال الشامي وذكر شيخ الإسلام لا ينبغي له أن يفعل على ما هو ظاهر الرواية ا هـ  وفي شرح المنية الأولى أن لا يفعل في الفرض ولو فعل لا يكره ای لا یکره تحریما

فقط اس عبارت سے پہلے یہ ہے اذا جمع بین سورتین فی رکعة رأ یت فی موضع انه لا باس به

احسن الفتاویٰ (76/3) میں ہے:

سوال :فرض نماز کی پہلی یا دوسری رکعت میں دو سورتیں پڑھنا جائز ہے یا نہیں اگر قصدا  یا سہوا  پڑھ لیا تو سجدہ سہو واجب ہوگا؟

الجواب :فرض نماز کی ایک رکعت میں دو سورتیں جمع کرکے پڑھنا خلاف اولیٰ ہے اور دو سورتوں کے درمیان ایک یا زیادہ   سورتیں چھوڑ کر پڑھنا مکروہ ہے، نوافل  میں کوئی کراہت نہیں خوا ہ قصدا  ہو یا سہوا اس سے سجدہ سہو واجب نہیں ہوتا۔

مسائل بہشتی زیور (175/1) میں ہے:

مسئلہ:اصل یہ ہے کہ فرض کی ہر رکعت میں الحمد کے سوا ایک ہی سورت پڑھے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم