کیا فوت شدہ رشتہ دار زندہ رشتہ داروں کے اعمال کو جانتے ہیں ؟

استفتاء

(۱) کیا فوت ہوگئے رشتہ دار اپنے زندہ رشتہ داروں کے عمل کو جانتے ہیں ؟  (۲) بعض روایات میں آتا ہے کہ والدین وغیرہ پر ان کے مرنے کے بعد اپنی اولاد کے اعمال جمعہ کے دن پیش ہوتے ہیں اور وہ نیک اعمال دیکھ کر خوش ہوتے ہیں ۔کیا یہ بات درست ہے؟

الجواب :بسم اللہ حامداًومصلیاً

(۱) فوت ہونے والے رشتہ دار از خود اپنے زندہ رشتہ داروں کے عمل کو نہیں جانتے ، البتہ بعض روایات میں آتا ہےکہ ان کے سامنے زندہ رشتہ داروں کے اعمال پیش کئے جاتےہیں۔

(۲) مذکورہ بات درست ہے ۔

چنانچہ مسند ابو داؤد طیالیسی (1/474) میں ہے 

عن الحسن ، عن جابر بن عبد الله ، قال : قال رسول الله صلى الله عليه وسلم : « إن أعمالكم تعرض على عشائركم وأقربائكم في قبورهم ، فإن كان خيرا استبشروا به ، وإن كان غير ذلك قالوا : اللهم ألهمهم أن يعملوا بطاعتك

الجامع الصغیر فی احادیث البشیر و النذیر (للامام جلال الدین عبدالرحمن بن ابی بکر السیوطیؒ) میں ہے 

تعرض الأعمال يوم الاثنين و الخميس على الله تعالى و تعرض على الأنبياء و على الآباء و الأمهات يوم الجمعة فيفرحون بحسناتهم و تزداد وجوههم بياضا و إشراقا فاتقوا الله و لا تؤذوا موتاكم

رواہ الحكيم الترمذی عن والد عبدالعزيز (ح) .

ترجمہ  : ہر پیر اور جمعرات کو اللہ تعالی کے حضور اعمال پیش کئے جاتے ہیں اور انبیاء کرام علیہم السلام اور والدین پر جمعہ کے دن اعمال پیش کئے جاتے ہیں اور ان کے چہرے مزید روشن اور سفید ہوجاتے ہیں ۔لہذا اللہ تعالی سے ڈرو اور اپنے فوت شدگان کو ایذا مت دو ۔

مذکورہ حدیث کے متعلق  شیخ الحدیث مولانا زکریا رحمہ اللہ  لکھتے ہیں

قلت : رواية الحکیم الترمذی عن والد عبدالعزیز ذکرها السیوطی فی الجامع و رقم عليه بالحسن۔ (اوجزالمسالک، باب حسن  الخلق ج14 ص 191 رقم الحدیث 2874)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم