بغیر آستین والے فراک کی تجارت کرنے کا حکم

استفتاء

کیا فرماتے ہیں مفتیان کرام اس مسئلہ کے متعلق کہ خواتین  کے بغیرآستین والے کپڑے ’’فراک‘‘کی تجارت کرنا کیسا ہے اور نابالغ بچیوں کے فراک کی تجارت کا شرعی حکم کیا ہے؟

الجواب :بسم اللہ حامداًومصلیاً

خواتین کے بغیر آستین والے فراک اس کو بیچنا جس کےبارے میں یقینی علم نہ ہو کہ وہ اسے غیر محرموں کے سامنے پہنے گی جائز ہے۔البتہ یقینی طور پر معلوم ہو تو ناجائز ہے ۔اور نابالغ اتنی چھوٹی بچیوں کے فراک جن پر ابھی پردےکے احکام لازم نہ ہوں بیچنا  بہرحال جائز  ہے۔

توجیہ :بغیر آستین والے فراک اپنے خاوند کے سامنے پہننے کی چونکہ  اجازت ہے یعنی  فی نفسہ اس کا جائز استعمال موجود ہے اور یہ بے دین عورتوں کا شعار بھی نہیں ہے۔ اس لئے جہاں یقینی طور پر معلوم نہ ہو کہ خریدار اسے گناہ کے کام میں استعمال کرے گا بیچنے کی گنجائش ہے۔

تبیین الحقائق شرح کنز الدقائق(3/296)میں ہے:

«قال – رحمه الله – (وكره بيع السلاح من أهل الفتنة) لأنه ‌إعانة ‌على ‌المعصية قال الله تعالى {وتعاونوا على البر والتقوى ولا تعاونوا على الإثم والعدوان} ولأن الواجب قلع سلاحهم بما أمكن حتى لا يستعملوه في الفتنة فالمنع أولى قال – رحمه الله – (وإن لم يدر أنه منهم لا) أي لم يدر أنه من أهل الفتنة لا يكره البيع له»

درمختارمع رد المحتار(6/408)میں ہے:

(ويكره) تحريما (بيع السلاح من أهل الفتنة إن علم) لأنه ‌إعانة ‌على ‌المعصية۔

(قوله: إن علم) أي إن علم البائع أن المشتري منهم۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم