(1)   الکحل  کپڑے  پر لگنے  کا حکم ،(2)وگ سر پر ہو تو مسح کا حکم

استفتاء

(1)۔الکحل حرام ہے اور اگر یہ کپڑوں پر لگ جائے تو کپڑے ناپاک ہوجاتے ہیں یا نہیں ؟(2) ۔وگ سر پر لگی ہوتو اس کے ساتھ مسح ہوجاتا ہے یا نہیں

الجواب :بسم اللہ حامداًومصلیاً

(1)۔  جو ” الکوحل "انگور، کھجور  کی شراب سے حاصل کی جائے وہ  نجس ہوتی ہے اور دوسری چیزوں  کو بھی نجس کردیتی ہے۔لہذا اس سے  ہاتھ، کپڑے  ناپاک  ہوجاتے ہیں ۔

اورجو” الکوحل "انگور، کھجور کے علاوہ کسی دوسری شے سے حاصل کی جائے مثلاً گنے کے شیرے وغیرہ سے تو اس کا محض مزےکے طور پر  پینا حرام ہے لیکن نہ  وہ   خودنجس  ہے اور نہ دوسری چیزوں کو نجس کرتی ہے ۔

(2)۔وضو میں ایک چوتھائی سر پر مسح کرنا فرض ہے اور پورے سر پر مسح کرنا سنت ہے لہذ ا اگر وگ پورے سر پر لگی ہوئی ہوچوتھائی سر بھی نہ کھلا ہوتو مسح کا فرض ادا نہیں ہوگا۔اگر کم از کم چوتھائی کے بقدر کھلا ہوتو اگر چہ فرض مسح ہوجائےگا لیکن سنت سے محرومی رہے گی ۔

تکملۃ فتح لملہم (3/342) میں ہے:"و أما غير الأشربة الأربعة، فليست نجسة عند الإمام ابي حنيفة رحمه الله تعالي.وبهذا يتبين حكم الكحول المسكرة (AL COHALS) التي عمت بها لبلوي ،فانها تستعمل في كثير من الادوية والعطور والمركبات الاخري ،فانها ان اتخذت من العنب او التمر فلا سبيل الي حلتها او طهارتها ،وان التخذت  من غيرهما فالامر فيها سهل علي مذهب ابي حنيفة رحمه الله تعالي ،ولا يحرم استعمالها للتداوي او لاعراض مباحة اخري مالم تبلغ حدالاسكار لانها انما تستعمل مركبة لمواد الاخري ولايحكم بنجاستها اخذا بقول ابي حنيفة رحمه الله تعالي ، و إن معظم الحكول التي تستعمل اليوم في الأودية و العطور و غيرهما لاتتخذ من العنب أو التمر، إنما تتخذ من الحبوب أو القشور أو البترول و غيره، كما ذكرنا في باب بيوع الخمر من كتاب البيوع”.

فتاوی ہندیہ (1/7)  میں ہے:وما تحت الاظافير من أعضاء الوضوء حتى لو كان فيه عجين يجب إيصال الماء إلى ما تحته كذا في الخلاصة

مریض ومعالج کے اسلامی احکام (ص:387) میں ہے:

4:۔اگر پورے سر پر جھلی لگی ہو تو وضومیں سرکے مسح کا فرض ادا نہیں ہوتا۔

5:۔اگر چوتھائی سر کی مقدار  کے برابر سر پر جھلی لگی ہو تو اگر چہ اس پر مسح کا فر ض ادا ہوجائے گالیکن مسح کی سنت کہ پورے سرکا مسح کیا جائے اس سے مستقل محرومی رہے گی ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم