جو بیٹی باپ کی زندگی میں فوت ہوجائے اس کی اولاد کو حصہ دینے کا حکم

استفتاء

میرے والدصاحب  نے ایک مربع  زمین خریدی، اس میں سے ایک ایکڑ زمین اپنی بیوی کے نام لگوادی ،اور 12،12ایکڑ زمین ہم دوبیٹوں  کے نا م لگوادی  ۔ ہماری چار بہنیں  ہیں ،والد صاحب  نے ان کے  نام زمین شروع  میں  کچھ مسائل کے پیش نظر نہیں  لگوائی تھی ۔پھر       والد صاحب  نے حالات  کو دیکھتے ہوئے  اب ہم دو بیٹوں  سے کہا کہ یہ زمین اپنی بہنوں  کے نام بھی لگواؤ ۔ہم دونوں بھائی تقریبا  رضامند  تھے  کہ ہماری بڑی بہن کا اچانک انتقال  ہوگیا ۔ہمارے  بہنوئی والد صاحب سے زبردستی اس زمین  میں سے اپنے بچوں کا حصہ مانگ رہےہیں ۔ہمارا سوال یہ ہے کہ کیا شرعی طور پر ہمارے والد صاحب  کے ذمے اس زمین میں سے اس فوت شدہ بیٹی  کے بچوں کو حصہ دینا ہے یا نہیں  ؟ میرے والد صاحب چاہتے ہیں کہ اگر ان کے ذمہ شرعا  ان کے بچوں کا کچھ دینا  بنتا ہے تو بہنوئی کے حوالہ کردیں ورنہ وہ اپنی مرضی سے جو چاہیں  فیصلہ کریں

الجواب :بسم اللہ حامداًومصلیاً

مذکورہ صورت میں آپ کے والدصاحب پر     ان  کی فوت شدہ     بیٹی  کے بچوں کا شرعی طور پر کوئی حصہ دینا نہیں بنتا     تاہم آپ کے والد صاحب انہیں  اپنی رضامندی سے کچھ    دینا چاہیں تو دے سکتے ہیں ۔

فتاوی شامی (10/525) میں ہے:"وأركانه ثلاثة وارث ومورث وموروث  وشروطه ثلاثة موت مورث حقيقة أو حكما كمفقود أو تقديرا كجنين فيه غرة ووجود وارثه عند موته حيا حقيقة أو تقديرا كالحمل والعلم بجهل إرثه”

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم