جمعہ کے بعد  احتیاطی ظہر کی نماز کا حکم

استفتاء

ایک بستی   میں سنی عقائد کے علماء  کی4 مساجد 2مدرسے  ہیں ،ایک پولیس کی چوکی ہے وہاں کئی سو سالوں سے جمعہ اور عید کی نمازیں ہورہی ہیں ،جمعہ کے بعد سنتیں پڑھی جارہی ہیں ۔اب جمعہ کے فرض  کےبعد فرض پڑھنے کو کہا جارہا ہے ،تو کیا جمعہ کے دن فرض کے بعد 4رکعات فرض پڑھیں ؟

الجواب :بسم اللہ حامداًومصلیاً

مذکورہ صورت میں جمعہ کی فرض نماز  پڑھنا کا فی ہے، اس کے بعد احتیاطی  ظہر کی نماز پڑھنے کی ضرورت نہیں  لہذا  جمعہ کے بعد مزید  چار فرض نہ پڑھے جائیں۔

بحرالرائق (2/245) میں ہے:

"أقول: وقدكثر ذلك من جهلة زماننا أيضا ومنشأ جهلهم صلاة الاربع بعد الجمعةبنية الظهر، وإنما وضعه بعض المتأخرين عند الشك في صحة الجمعة بسبب رواية عدم تعددها في مصر واحد وليست هذه الرواية بالمختارة، وليس هذا القول  أعني اختيار صلاة الاربع بعدها – مرويا عن أبي حنيفة وصاحبيه حتى وقع لي أني أفتيت مرارا بعدم صلاتها خوفا على اعتقاد الجهلة بأنها الفرض وأن الجمعة ليست بفرض”

فتاوی شامی (3/20) میں ہے:

"نعم إن أدى إلى مفسدة لا تفعل جهارا والكلام عند عدمها ولذا قال المقدسي نحن لا نأمر بذلك أمثال هذه العوام بل ندل عليه الخواص ولو بالنسبة إليهم اه "

فتاوی رشیدیہ(ص:410) میں ہے:

"نماز احتیاط الظہر جو اکثر لوگ بعد جمعہ  کے پڑھتے ہیں ،یہ نماز نہ عند الحدیث درست ہے او ر نہ فقہ میں پائی گئی،یہ صرف علماء کا قیاس ہے کیونکہ یہ نماز خیرالقرون میں نہیں پائی گئی ،پس کتاب اللہ اور سنت رسول اللہ ﷺ  سےثابت نہیں  ہے ۔تو ایسی نماز کا پڑھنا بدعت سیئہ  ہے نیکی برباد گناہ لازم کا مضمون معلوم ہوتا ہے”

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم