آئندہ وصول ہونے والا کرایہ، دین کی کونسی قسم میں داخل ہے

استفتاء

عام طور سے جو مکان کرایہ پر دیے جاتے ہیں ان کا قابل وصول کرایہ کس دین میں داخل ہے۔ یعنی دین قوی، دین متوسط یا دین ضعیف ان تینوں میں کس کے تحت آتا ہے؟

الجواب :بسم اللہ حامداًومصلیاً

تجارت کے علاوہ مکان  وزمین کے کرایہ کے  بارے میں امام ابو حنیفہ رحمہ اللہ کی دو روایتیں ہیں۔ ایک روایت دین ضعیف کی اور دوسری دین متوسط کی ۔

المبسوط للسرخسي (2/ 196)

وفي الأجرة ثلاث روايات عن أبي حنيفة – رحمه الله تعالى – في رواية جعلها كالمهر؛ لأنها ليست ببدل عن المال حقيقة؛ لأنها بدل عن المنفعة، وفي رواية جعلها كبدل ثياب البذلة؛ لأن المنافع مال من وجه لكنه ليس بمحل لوجوب الزكاة فيه. والأصح أن أجرة دار التجارة أو عبد التجارة بمنزلة ثمن متاع التجارة كلما قبض منها أربعين تلزمه الزكاة اعتبارا لبدل المنفعة ببدل العين.

احسن الفتاویٰ: (4/271) میں ہے:

’’زمین اور مکان وغیرہ کی اجرت  کا دین:  چونکہ مال کی منفعت بھی من وجہ مال ہے، اس لیے مکان، زمین اور دوسرے اموال کی اجرت کے دین سے متعلق امام صاحب رحمہ اللہ سے تین روایتیں ہیں: ایک یہ کہ دین اجرت ضعیف ہے، دوسری روایت دین متوسط کی ہے، تیسری روایت یہ ہے کہ مالِ تجارت کی اجرت دین قوی ہے۔ پس مال غیر تجارت کی اجرت سے متعلق صرف دو روایتیں ہوئیں۔ ضعیف اور متوسط ۔۔۔ الخ‘‘

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ فقط و اللہ تعالیٰ اعلم