آیت سجدہ چھوڑ کر باقی سورت کی تلاوت کرنے کا حکم

استفتاء

نماز یا نماز کے علاوہ تلاوت کے دوران سجدہ کی آیت چھوڑ دینا اور آگے بڑھ جانا کیسا ہے؟

الجواب :بسم اللہ حامداًومصلیاً

دوران تلاوت آیت سجدہ ترک کرکے بقیہ سورت تلاوت کرنا مکروہ تحریمی اور ممنوع ہے۔

شامی (2/117) میں ہے:

(وكره ترك اية سجدة وقراءة باقي سورة) لان فيه قطع نظم القران وتغيير تاليفه،واتباع النظم والتاليف مامور به بدائع،مفاده ان الكراهة تحريمية.

قوله(فيه قطع الخ)و قال محمد في الجامع الصغير لان فيه هجر شيء من القران وذلك ليس من اعمال المسلمين.و لانه فرار من السجدة وذلك ليس من اخلاق المؤمنين.

مسائل بہشتی زیور (1/238) میں ہے:

ساری سورت پڑھنا اور سجدے کی آیت کو چھوڑ دینا مکروہ تحریمی اور منع ہے۔فقط سجدہ سے بچنے کے لئے وہ آیت نہ چھوڑے کہ اس میں سجدہ سے گویا انکار ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم