اگر امام بھول کر پانچويں ركعت کیلیےکھڑا ہو جائے تو   كيا مسبوق امام كی اتباع کر سکتا ہے؟

استفتاء

چار رکعت والی نماز میں اگر امام قعدہ اخیرہ کر کے غلطی سے پانچویں رکعت کے لئے کھڑا ہو جائے اور دو رکعت اور ملا لے تو ان دو رکعتوں میں مسبوق امام کی اقتدا کر سکتا ہے یا نہیں؟

الجواب :بسم اللہ حامداًومصلیاً

مذکورہ صورت میں مسبوق ان دو رکعتوں میں امام کی اقتداء نہیں کرسکتا ۔

رد المحتار (1/626)ميں ہے:

ولو قام إمامه لخامسة فتابعه ، إن بعد القعود تفسد وإلا لا حتى يقيد الخامسة بسجدة .قوله تفسد اى صلوة المسبوق  لانه اقتداء فى موضع الانفراد

امداد الاحکام (1/548)میں ہے:

سوال:  چار رکعت والی نماز میں اگر امام قعدہ اخیرہ کرکے سہواًکھڑاہوجائے اور دو رکعت اور منضم کرلے تو ان دو رکعت میں مسبوق اس امام کی اقتداء کرسکتا ہے یا نہیں؟ اور درصورت جوازیہ دو رکعت مسبوق کے حق میں کیا ہوگی؟

الجواب:  قعدہ اخیرہ کے بعد اگر امام سہواً کھڑاہوجائے تو مسبوق کو اس زائد نمازمیں اقتداء جائز نہیں، اگر اقتداء کرلے گاتو مسبوق کی نمازفاسد ہوجائے گی ،

قال فی الدر ولو قام إمامه لخامسة فتابعه ، إن بعد القعود تفسد وإلا لا حتى يقيد الخامسة بسجدة . قال الشامی قوله تفسد اى صلوة المسبوق  لانه اقتداء فى موضع الانفراد

(ص ۶۲۶ ج۱) واللہ اعلم، ۴ ذی الحجہ ۱۳۴۱ھ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم