سحری کے وقت منہ میں نسوار رکھ کر سو گیا جب بیدار ہوا تو صبح کی اذان ہو چکی تھی تو اب روزے کا کیا حکم ہے؟

استفتاء

اگر ایک بندہ سحری کرنے کے بعد نسوار منہ میں رکھے اور سو جائے یعنی سحری کا وقت باقی ہو اور نسوار رکھے اور  سو جائے اور جب بیدار ہو  تو  صبح کی اذان ہو چکی  ہو  تو کیا اس شخص کا روزہ ہوا یا نہیں؟

الجواب :بسم اللہ حامداًومصلیاً

مذکورہ شخص کا روزہ نہیں ہوا لہٰذا  وہ اس کی قضا کرے۔

شامی(3/443، مکتبہ رحمانیہ) میں ہے:اختلفوا في معنى التغذي قال بعضهم أن يميل الطبع إلى أكله وتنقضي شهوة البطن به، وقال بعضهم: هو ما يعود نفعه إلى صلاح البدن وفائدته فيما إذا مضغ لقمة ثم أخرجها ثم ابتلعها، فعلى الثاني يكفر لا على الأول، وبالعكس في الحشيشة لأنه لا نفع فيها للبدن، وربما تنقص عقله ويميل إليها الطبع وتنقضي بها شهوة البطن اه

الدر المختار(3/429)میں ہے:(و ان افطر خطأ)كان تمضمض فسبقه الماء او شرب نائما او تسحر ……….(قضى) (فقط)و في الشامية تحت قوله(فقط)اى بدون كفارة

فتاوی عثمانی (2/193)میں ہے:

تمباکو،نسوار وغیرہ کا استعمال مباح ہے،اس سے روزہ بھی فاسد ہو جاتا  ہےاس لئے کہ نسوار کا منہ میں رکھنا عملا کھانے کے حکم میں ہے۔

فتاوی حقانیہ(4/167)میں ہے:

نسوار منہ میں ڈالنے سے لعاب کے ساتھ مل کر پیٹ کے اندر چلی جاتی ہے جو کہ فساد روزہ کا ذریعہ ہے  بلکہ نسوار کے عادی لوگ اس کو غذا کا نعم البدل سمجھتے ہیں اس لئے نسوار منہ میں ڈالنے سے روزہ فاسد ہوجاتا ہے

بہشتی زیور (288)میں ہے:

منہ میں پان دبا کر سو  گئی اورصبح ہو جانے کے بعد آنکھ کھلی تو روزہ نہیں ہوا قضا کرے اور کفارہ واجب نہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم