بیوی کو طلاق کی نیت کے بغیر ’’ اگر نہیں آئی تو میری طرف سے طلاق سمجھنا‘‘ کا میسج بھیجنے سے طلاق کا حکم

استفتاء

خاوند نے بیوی سے کہا:

’’آپ  جہاں بھی ہیں، آج بروز بدھ بتاریخ 17مارچ 2021ء دوپہر 3بجے سے پہلے گھر پہنچ جائیں، اگر نہیں آئی تو میری طرف سے طلاق سمجھنا۔‘‘

وضاحت مطلوب ہے کہ:( 1)پھر آگے کیا ہوا؟،بیوی گھر پہنچی یا نہیں؟

(2)خاوند کی نیت کیا تھی؟

(3) یہ الفاظ زبان سے بولے تھے یا پیپر وغیرہ میں لکھے تھے؟

جواب وضاحت: (1)بیوی گھر نہیں پہنچی، (2)خاوند کی نیت صرف ڈرانے کی تھی، طلاق کی نہ تھی، (3)الفاظ واٹس ایپ پر تحریری میسج کی صورت میں بھیجے تھے۔

الجواب :بسم اللہ حامداًومصلیاً

مذکورہ صورت میں کوئی طلاق واقع نہیں ہوئی۔کیونکہ ہماری تحقیق کے مطابق میسج کی تحریر غیر مرسوم ہے جس سے طلاق کا واقع ہونا شوہر کی نیت پر موقوف ہوتا ہے۔ مذکورہ صورت میں چونکہ شوہر نے طلاق کی نیت نہیں کی تھی اس لیے طلاق واقع نہیں ہوئی۔

تبیین الحقائق (6/218) میں ہے:ثم الكتاب على ثلاث مراتب ……… ومستبين غير مرسوم كالكتابة على الجدران وأوراق الأشجار أو على الكاغد لا على وجه الرسم فإن هذا يكون لغوا لأنه لا عرف في إظهار الأمر بهذا الطريق فلا يكون حجة إلا بانضمام شيء آخر إليه كالنية والإشهاد عليه والإملاء على الغير حتى يكتبه لأن الكتابة قد تكون للتجربة وقد تكون للتحقيق . وبهذه الأشياء تتعين الجهة…رد المحتار (442/4) میں ہے:وإن كانت مستبينة لكنها غير مرسومة إن نوى الطلاق يقع وإلا لا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالیٰ اعلم