دوسری بیوی کے بھائی سے اپنی بیٹی کا نکاح کرنے کا حکم

استفتاء

کیا فرماتے ہیں علماء کرام اس مسئلہ کے بارے میں  کہ میری  بیوی کا انتقال ہوچکا ہے  ، اس سے میری ایک بیٹی ہے   میں نے دوسری  شادی کرلی ہے    اور میں اس بیٹی کا نکاح اپنی موجودہ  بیوی  کےبھائی کے ساتھ کرنا چاہتا ہوں  ۔ تو کیا یہ نکاح جائز ہے ؟

الجواب :بسم اللہ حامداًومصلیاً

مذکورہ صورت میں  آپ  کی دوسری بیوی کے بھائی سے آپ کی بیٹی کا نکاح جائز ہے  ۔کیونکہ مذکورہ صورت میں حرمت کے اسباب  میں سے کوئی سبب موجود نہیں ۔

ردالمحتار(4/84) میں ہے:

وأما بنت زوجة أبيه أو ابنه فحلال ) وكذا بنت ابنها بحر .قال الخير الرملي : ولا تحرم بنت زوج الأم ولا أمه ولا أم زوجة الأب ولا بنتها۔

شامی کی  مذکورہ عبارت سے معلوم ہو ا کہ سوتیلی ماں  کی ماں سے اور بیٹی سے نکاح  جائز ہے ،لہذا جب سوتیلی ماں کےاصول وفروع سے نکاح جائز ہے تو اس کےبھائی سے بطریق اولی نکاح جائز ہوگا۔

کفایت المفتی(5/46) میں ہے:

سوال :۔ زید کی بیوی دو لڑکیا ں چھوڑ کرفوت ہوگئی۔کچھ عرصے کے بعد زید نے حامد کی لڑکی دسے شادی کی ۔اس لڑکی کے دوبھائی ہیں ۔کیا ان دونوں لڑکوں کی شادی زیدکی   دونوں لڑکیوں سے ہوسکتی ہے ؟

الجواب :۔زید کی لڑکیوں کی شادی    اپنی سوتیلی  ماں کے بھائیوں سے ہوسکتی ہے ۔کیونکہ اس رشتہ میں حرمت کی کوئی وجہ نہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم