فیس بک پرتشہیر کےذریعے کمیشن لینا

استفتاء

اگرزید کسی دوسرے شخص کی مصنوعات کی تشہیرکرے اورگاہک ملنے پر دوسرے شخص کو مطلع کردے اوروہ گاہک کو اس کی مطلوبہ چیز پہنچادے جبکہ زید کو پہلے سے طے شدہ فیصد کےحساب سے منافع مل جائے تو ایسا منافع زید کےلیے حلال ہوگا یا نہیں؟

وضاحت مطلوب ہے کہ (1)تشہیر کاذریعہ کاکیاہوگا؟(2)تشہیر کی وجہ سے گاہک پہلے زید سے کیوں رابطہ کرے گا؟ ڈائرکٹ مصنوعات والے سے رابطہ کیوں نہیں کرےگا؟

جواب وضاحت:زیدتشہیر فیس بک کےذریعےکرے گا اورزید اپنا رابطہ نمبر دے گا کیونکہ جس کی مصنوعات ہیں اس سے یہ طے شدہ ہے کہ زید اپنے حوالے سے گاہک لائے گا۔

الجواب :بسم اللہ حامداًومصلیاً

اگرگاہک کو بھی زید کی کمیشن والی حیثیت معلوم ہو(مثلاً زید کےگاہک کےساتھ کوئی ذاتی تعلقات نہ ہوں جن کی وجہ سے گاہک یہ سمجھے کہ زید خیرسگالی کررہاہے)تو جائز ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم