کسی گناہ کے کرنے پر روزوں کی منت ماننا

استفتاء

میں نے ایک قبیح فعل کے متعلق ایک جملہ بولا کہ جب بھی میں نے  یہ کام کیا تو میں قسم کھا کر کہتا ہوں ،اپنے اوپر لازم کرتا ہوں اور اللہ کے لیے منت مانتا ہو ں کہ ہر دفعہ اس فعل کے کرنے پر تین روزے لگاتار رکھوں گا ۔

اب وہ کام مجھ سے کئی بار ہو چکا ہے ۔۔اب میرے لیے کیا حکم ہے؟

الجواب :بسم اللہ حامداًومصلیاً

مذکورہ صورت میں ہر دفعہ وہ قبیح فعل کرنے پر نذر واقع ہو جا ئے گی،البتہ ہر مرتبہ یہ اختیار ہو گا کہ جس چیز کی نذر مانی ہے (یعنی روزے)اس کو پورا کرے یا اس کی جگہ قسم کا کفارہ ادا کرے۔

فتاوى الہندیہ(2/53)میں ہے:

أو قال أحلف أو أحلف بالله أو أقسم أو أقسم بالله يكون يمينا.

فتاویٰ عالمگیری(2/65) میں ہے:

إن علق النذر بشرط يريد كونه كقوله إن ‌شفى ‌الله مريضي أو رد غائبي لا يخرج عنه بالكفارة كذا في المبسوط. ويلزمه عين ما سمى كذا في فتاوى قاضي خان.وإن علق بشرط لا يريد كونه كدخول الدار أو نحوه يتخير بين الكفارة وبين عين ما التزمه

الدر المختار(5/709) میں ہے:

(حلف لا يفعل كذا ‌وتركه ‌على ‌الابد) لان الفعل يقتضي مصدرا منكرا والنكرة في النفي تعم (فلو فعل) المحلوف عليه (مرة) حنث و (انحلت يمينه) وما في شرح المجمع من عدمه سهو (فلو فعله مرة أخرى لا يحنث) ألا في كلما

مسائل بہشتی زیور(179) میں ہے:

اگر ایسے کام کے ہونے  پر منت مانی جس کے ہونے کو چاہتا اور تمنا کرتا ہو کہ یہ کام ہوجائے جیسے یوں کہے کہ اگر میں اچھا ہوجاؤں تو ایسا کروں۔ اگر میرا بھائی خیریت سے آجائے تو ایسا کروں۔ اگر میرا بیٹا مقدمہ سے بری ہوجائے یا نوکر ہوجائے تو ایسا کروں تو جب وہ کام ہوجائے منت پوری کرے اور اگر ایسے کام کی منت مانی جس کو کرنا نہیں چاہتا اور اس طرح کہا کہ اگر میں تجھ سے بولوں تو  دو روزے رکھوں یا یہ کہا کہ اگر آج میں نماز نہ پڑھوں تو ایک سو روپیہ خیرات  کروں پھر اس سے بول دیا یا نماز  نہ پڑھی تو اختیار ہے، چاہے قسم  کا کفارہ دیدے اور چاہے روزے رکھے اور ایک سو روپیہ خیرات کرے کیونکہ یہ ظاہری صورت میں تو نذر ہے جبکہ معنی کے اعتبار سے قسم ہے کیونکہ غیر مطلوب کام پر قسم بھی اسی لیے کھائی جاتی ہے کہ اس کام سے بچ سکے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم