کیاقرآن کریم مخلوق ہے؟

استفتاء

1۔عقیدہ اورسچائی یہی ہے کہ ایک خالق کائنات ہے باقی سب مخلوق ہے ۔

قرآن کریم کےبارے میں دریافت کرنا ہے کہ یہ بھی مخلوق ِخدا ہے؟

2۔ہمارے گھروں میں موجود قرآنِ کریم کو ہم مخلوق کادرجہ دیں گے؟

الجواب :بسم اللہ حامداًومصلیاً

1۔2۔قرآن کریم مخلوق بھی ہے اورغیر مخلوق بھی ہے،اس کی تفصیل یہ ہے کہ قرآن کریم اللہ تعالی کاکلام ہے اورکلام خواہ انسان کاہو یا اللہ تعالی کا،اس کی دو قسمیں ہیں (۱)کلام نفسی (۲)کلام لفظی ۔کلام نفسی سے مراد وہ کلام ہے جسے زبان ،قلم ،اشارہ وغیرہ کےذریعے اداکرنے سے پہلے ذہن میں ترتیب دیا جاتا ہے اورکلام لفظی سے مراد وہ کلام ہے جسے زبان وغیرہ کےذریعے اداکیا جاتا ہے ،انسان کاکلام نفسی اورلفظی دونوں حادث ہیں اوراللہ تعالی کاکلام لفظی حادث اورمخلوق ہےجبکہ کلام نفسی ازلی غیر حادث اورغیر مخلوق ہے،کیونکہ یہ اللہ تعالی کی ذاتی صفت ہےاورجس طرح اللہ تعالی کی ذات ازلی غیرحادث اورغیرمخلوق ہےاسی طرح اللہ تعالی کی صفات ذاتیہ بھی ازلی غیر حادث اورغیر مخلوق ہیں۔لہذا قرآن کریم کلام لفظی ہونے کی حیثیت سے مخلوق خدا ہے اورکلام نفسی ہونے کی حیثیت سے اللہ تعالی کی ذاتی صفت ہے اور غیر مخلوق ہے اورجو قرآن کریم ہمارے گھروں موجود ہے بلکہ جو قرآن آپ ﷺ نے کاتبان وحی کےذریعے لکھوایا یہ سب کلام لفظی ہی میں داخل ہے ،لہذا یہ سب مخلوق ہے ۔

شرح کتاب الفقہ الاکبر للملا علی القاری الحنفی(ص:47)میں ہے:

(والقرآن کلام الله تعالي……ولفظنا بالقرآن مخلوق وکتابتنا له مخلوقة وقراءتنا مخلوقة والقرآن) اي کلامه النفسي ونعته القدسي(غير مخلوق)اي ولاحال في المصاحف ولاغيرها وذلک ان کل من يأمر وينهي ويخبر عن مامضي يجدفي نفسه معني يدل عليه بالعبارة اويشير اليه بالکتابة اوالاشارة (وماذکرالله تعالي في القرآن حکاية عن موسي وغيره من الانبياء عليهم الصلاة والسلام)اي اخبارا منهم اوحکاية عنهم(وعن فرعون وابليس فان ذلک)اي ماذکر من النوعين( کله)علي مافي نسخة اي جميعه( کلام الله تعالي)القديم( اخبارا عنهم)اي وفق ماقدکتب من الکلمات الدالة عليه في اللوح المحفوظ قبل خلق السماء والارض والروح لابکلام حادث حصل بعد علم حادث عندسمعه من موسي وعيسي وغيرهما من الانبياءعليهم الصلاة والسلام..(وکلام الله تعالي)اي ماينسب اليه سبحانه( غير مخلوق)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم