دوران نماز منہ میں پانی کی کچھ مقدار آئے اور خود بخود ہی اندر چلی جائے اس صورت میں نماز کا حکم

استفتاء

1۔نماز کے دوران  اگر حلق سے کچھ پانی کی مقدار منہ میں آئے اور خو د بخود ہی اندر چلی جائے تو کیا نماز پر کوئی فرق پڑے گا؟

2۔اور اگرجان بوجھ کر اندر لے لی جائے  تو اس صورت میں  کیا نماز پر کوئی فرق پڑے گا؟

الجواب :بسم اللہ حامداًومصلیاً

1۔وہ مقدار منہ بھر کر تھی تو وضو ٹوٹ جائے گا لہذا  وضو کرکے دوبارہ نماز پڑھنی ہوگی اور اگر منہ بھر   کر سے کم تھی تو نہ  وضو ٹوٹا اور نہ نماز پر کچھ اثر پڑا۔

 2۔جان بوجھ کر پانی اندر لے  جانے کی صورت میں نماز ٹوٹ جائے گی،چاہے پانی کی مقدار منہ بھر کر ہو یا کم ہو، لہذا ایسی صورت میں نماز   دوبارہ پڑھنی ہوگی۔

المبسوط للسرخسی(1/353)میں ہے:

إن قلس أقل من ‌ملء ‌الفم ثم رجع فدخل جوفه وهو لا يملكه فهذا بمنزلة ريقه، ألا ترى أنه لا ينقض وضوءه فكذلك لا يفسد صلاته، والمتهجد بالليل فقد يبتلى بهذا خصوصا في ليالي رمضان إذا امتلأ من الطعام عند الفطر، فللبلوى قلنا لا تفسد صلاته

فتاوی عالمگیری(1/219)میں ہے:

وإن قاء ملء الفم وابتلعه وهو يقدر على أن يمنعه تفسد صلاته وإن لم يكن ملء الفم لا تفسد صلاته في قول أبي يوسف – رحمه الله تعالى – وتفسد في قول محمد – رحمه الله تعالى – والأحوط قوله كذا في فتاوى قاضي خان

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم