نماز میں صفیں سیدھی کرنے کا حکم

استفتاء

کیا فرماتے علماءکرام اس مسئلہ کے بارے میں کہ یہ جونماز سے پہلے صفیں سیدھی کرنے کےلیے کہا جاتا ہے کہ کندھے  کے ساتھ کندھا ملائیں اور ٹخنوں کے ساتھ ٹخنہ ملائیں تو کندھے ملانے کی تو احادیث آئی ہیں

(1)۔ تو کیا ٹخنہ ملانے کی بھی آحادیث    موجودہیں ؟(2)۔اور  یہ بات بھی پوچھنی ہے کہ نماز میں صفیں سیدھی کرنا مقصود ہوتا ہے یا کندھے  ملانا یعنی صف سیدھی ہواور کندھا نہ ملاہو۔ تو کیا کندھے والی احادیث پر عمل کرنانہیں ہوگا؟

الجواب :بسم اللہ حامداًومصلیاً

(1)۔ٹخنہ ملانے کی احادیث بھی  موجود ہیں جیسا کہ ذیل میں مذکور ہیں (2)۔اصل مقصود صف سیدھی کرنا ہے کندھے یا ٹخنے ملانا مقصود نہیں بلکہ بعض اوقات حقیقتا کندھے اور ٹخنے ملانا ممکن بھی نہیں ہوتا۔

ابوداؤد شریف (1/106) میں ہے

” عن نعمان بن بشير يقول أقبل رسول الله صلى الله عليه وسلم على الناس بوجهه فقال  أقيموا صفوفكم  ثلاثا والله لتقيمن صفوفكم أو ليخالفن الله بين قلوبكم  قال فرأيت الرجل يلزق منكبه بمنكب صاحبه وركبته بركبة صاحبه وكعبه بكعبه”.

“(حضرت نعمان بن بشیر رضی اللہ عنہ سے روایت ہے کہ آپ ﷺ  صحابہ کرام  رضوان اللہ عنہ اجمعین  کی طرف متوجہ ہوئےاور تین بار ارشاد فرمایا کہ : اپنی صفوں کو درست رکھو ،اللہ تعالی کی قسم یا تو تم بالضرور اپنی صفوں کو سیدھا کروگے یا اللہ تعالی تمہارےدلوں میں ایک دوسرے کی مخالفت ڈال دے گا ،حضرت نعمان بن بشیر رضی اللہ عنہ فرماتے ہیں کہ اس کے بعد میں نے دیکھا کہ ایک شخص دوسرے کے کندھے سے کندھا گھٹنے سے گھٹنا اور ٹخنے سے ٹخنہ ملاتا ہے ،)”

عمدۃ القاری (5/259) میں ہے

“واشار بهذا الي المبالغة في تعديل الصفوف وسد الخلل فيه “

(“الزاق” سے مراد صف سدھی رکھنے اور خالی جگہوں کو پورا کرنے میں مبالغہ ہے۔)

فیض الباری (2/302) میں ہے

وهو المراد عند الفقهاء الاربعة اي لا يترك في البين فرجة تسع فيها ثالثا

(فقہائے اربعہ کے نزدیک یہی مراد ہے کہ درمیان میں اتنی جگہ نہ چھوڑی جائے جس میں تیسرا آدمی آسکتا ہو۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم