اونٹ کی قربانی میں سات سے زائد   حصوں کا حکم

استفتاء

سیدنا حضرت  عبد اللہ بن عباس رضی اللہ عنہما سے روایت ہے :  کہ ہم رسول اللہ ﷺ کے ساتھ سفر میں تھے کہ عید الاضحی  آگئی ۔تب ہم ایک گائے میں سات آدمی اور ایک اونٹ میں دس آدمی شریک ہوئے ۔ (جامع الترمذی )

(1)۔اب سوال یہ ہے کہ کیا اونٹ میں  دس حصے ہوسکتے ہیں ؟(2)۔  کیا   یہ حدیث مستند ہے؟

الجواب :بسم اللہ حامداًومصلیاً

(1)۔ نہیں ۔اونٹ میں بھی سات حصے ہی ہوتے ہیں ۔

(2)۔اس  حدیث کی سند میں ایک راوی ” حسین بن واقد "ہےجس پر محدثین نے   کلام کیاہے۔ چنانچہ امام ابن حبان ؒ فرماتے ہیں کہ یہ بعض اوقات روایات میں غلطی کرجاتے ہیں ،امام احمد بن حنبل ؒ فرماتے ہیں کہ   ان   کی احادیث  میں ایسی باتیں ہوتی  ہیں کہ میں نہیں جانتا کہ وہ کیا ہیں ؟امام سخاوی ؒ فرماتے ہیں ان کو وہم   ہوجاتا ہے۔

چنانچہ اعلاءسنن(17/203) میں ہے:

ففيه أن سنده حسين بن واقد واضطرب فيه فقال تارة : عن علباء بن أحمر عن عكرمه عن ابن عباس كما رواه عنه الترمذي وغيره ۔وأخري عن عكرمه عن ابن عباس كمارواه الحاكم في "المستدرك”وهذا يدل علي أنه لم يحفظ الرواية كما هي ،وحسين بن واقد وان كان من أهل الصدق والديانة الا أنه كان يهم ويخطئ

قال ابن حبان :ربما أخطأ في الروايات ،وقال السخاوي :فيه نظر وهو صدوق يهم ،وقال العقيلي :أنكر أحمد بن حنبل حديثه ،وفي روية عنه في أحاديثه زيادة ماأدري أيش هي ؟ونفض يده ،وفي رواية عنه :ماأنكر حديث حسين بن واقد عن أبي منيب ،فالظاهرأن قوله عن عشرة من اوهامه،

نیز یہ حدیث دیگر صحیح احادیث  کے بھی خلاف ہے ۔

چنانچہ مسلم شریف(1/424) میں ہے:

"عن جابر قال خرجنا مع رسول الله صلى الله عليه وسلم مهللين بالحج فأمرنا رسول الله صلى الله عليه وسلم أن نشترك في الإبل والبقر كل سبعة منا في بدنة "

ترجمہ:حضرت جابر رضی اللہ عنہ سے روایت ہے کہ ہم  حج کا  احرام باندھ کر رسول اللہ ﷺ کے ساتھ نکلے ،پس اللہ  کے رسول ﷺ نے  ہمیں حکم دیا  کہ ہم اونٹ اور گائے میں شریک ہوجائے  اس طور پر  کہ ہم  میں سے سات آدمی اس جانور میں شریک ہوں ۔

ترمذی شریف (1/408) میں ہے:

"عن جابر قال نحرنا مع رسول الله صلى الله عليه وسلم بالحديبية البدنة عن سبعة والبقرة عن سبعة ۔

ترجمہ: حضرت جابر رضی اللہ عنہ سے روایت ہے کہ”حدیبیہ ” کے مقام پر ہم نے رسول اللہ ﷺ کے ساتھ اونٹ اور گائے میں سات آدمیوں کی طرف سے قربانی کیا۔

قال أبو عيسى :هذا حديث حسن صحيح والعمل على هذا عند أهل العلم من أصحاب النبي صلى الله عليه وسلم وغيرهم وهو قول سفيان الثوري وابن المبارك والشافعي وأحمد وإسحاق”

امام ترمذی ؒ اس  حدیث کے متعلق فرماتے ہیں: یہ حدیث حسن ،صحیح ہے ،اور اونٹ میں صرف سات آدمیو ں  کے شریک ہونے پراہل علم صحابہ رضی اللہ عنہم  اور تابعین رحمھم اللہ  کا عمل ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم