قربانی کے جانوروں کے اوصاف و عیوب اور ان کے احکام

استفتاء

قربانی کے جانوروں کے اوصاف  وعیوب اور ان کے احکام

مسئلہ: جانور پہلے صحیح سالم تھا۔ ذبح کرتے وقت جانور میں کوئی ایسا عیب پیدا ہوگیا جس کے ہوتے ہوئے قربانی جائز نہیں ہوتی تو ایسا عیب معاف ہے۔ جیسے جانور کو گراتے وقت ٹانگ ٹوٹ گئی یا بھاگنے کی وجہ سے کسی چیز سے ٹکرایا  اور  اسکی آنکھ ضائع ہوگئی تب بھی ایسے جانور کی قربانی درست ہے۔

کیا یہ پوسٹ درست ہے؟

الجواب :بسم اللہ حامداًومصلیاً

مذکورہ پوسٹ میں  جو مسائل  پاؤں،دانت،سینگ ،رسولی، تھن،آنکھ،ناک ،حاملہ،خصی اور کمزوری  کے  عنوان کے تحت مذکور ہیں  وہ درست ہیں۔اسی طرح پوسٹ کے آخر میں ذکر کردہ مسئلہ بھی درست ہے۔البتہ کان، زبان اور دم کے کٹے ہونے کی صورت میں جو مذکور ہے وہ بعض اقوال کے پیش نظر تو درست ہے جبکہ دیگر بعض اقوال کے پیشِ نظر درست نہیں جس کی تفصیل یہ ہے کہ اگر مذکورہ اعضاء کٹے ہوئے ہوں تو ان کے بارے میں مندرجہ ذیل   چار اقوال ہیں:

1:اگر ایک تہائی سے زائد کٹے ہوں تو قربانی جائز نہیں اور اگر ایک تہائی یا اس سے کم کٹے ہوں تو جائز ہے۔

2:اگر ایک تہائی   یا اس سے زائد کٹے ہوں تو جائز نہیں اور اگر ایک تہائی سے کم کٹے ہوں تو جائز ہے۔

3:اگر ایک چوتھائی یا اس سے زائد کٹے ہوں تو قربانی جائز نہیں اور اگر اس سے کم کٹے ہوں تو جائز ہے۔

4:اگر آدھے یا اس سے زائد کٹے ہوں تو قربانی جائز نہیں اور اگر آدھے سے کم کٹے ہوں تو جائز ہے۔

ہماری تحقیق میں مذکورہ اقوال میں سے دوسرا قول راجح اور احتیاط پر مبنی ہے کیونکہ ان اقوال میں سے تہائی سے زیادہ کا قول ظاہر الروایہ ہے اور تہائی والے قول میں مزید احتیاط ہے۔

نیز زبان کے کٹنے میں بھی تفصیل ہے کہ اگر گائے کی زبان تہائی  یا تہائی سے زائد کٹی ہو تو قربانی جائز نہیں جبکہ بکری کی پوری زبان بھی کٹی ہوئی ہو   تو اس کی قربانی جائز ہے  اس لیے کہ زبان کا کٹا ہونا گائے میں تو عیب ہے کیونکہ وہ زبان سے چارہ لیتی ہے  لیکن بکری میں عیب نہیں کیونکہ وہ دانتوں سے چارہ لیتی ہے۔

شامی(9/536)میں ہے:

(قوله ومقطوع أكثر الأذن إلخ) في البدائع: لو ذهب بعض الأذن أو الألية أو الذنب أو العين. ذكر في الجامع الصغير إن كان كثيرا يمنع، وإن يسيرا لا يمنع. واختلف أصحابنا في الفاصل ‌بين ‌القليل ‌والكثير؟ فعن أبي حنيفة أربع روايات. روى محمد عنه في الأصل والجامع الصغير أن المانع ذهاب أكثر من الثلث، وعنه أنه الثلث، وعنه أنه الربع، وعنه أن يكون الذاهب أقل من الباقي أو مثله اهـ بالمعنى والأولى هي ظاهر الرواية، وصححها في الخانية حيث قال: والصحيح أن الثلث، وما دونه قليل، وما زاد عليه كثير وعليه الفتوى اهـ ومشى عليها في مختصر الوقاية والإصلاح. …………. تجوز التضحية بالمجبوب العاجز عن الجماع، والتي بها سعال، والعاجزة عن الولادة لكبر سنها، والتي لها كي، والتي لا لسان لها في الغنم خلاصة: أي لا البقر لأنه يأخذ العلف باللسان والشاة بالسن كما في القهستاني عن المنية، وقيل إن انقطع من اللسان أكثر من الثلث لا يجوز. أقول: وهو الذي يظهر قياسا على الأذن والذنب بل أولى لأنه يقصد بالأكل، وقد يخل قطعه بالعلف تأمل

ہندیہ (5/ 298)میں ہے:

وفي اليتيمة كتبت إلى أبي الحسن علي المرغيناني، ولو كانت الشاة ‌مقطوعة ‌اللسان هل تجوز التضحية بها؟ . فقال: نعم إن كان لا يخل بالاعتلاف، وإن كان يخل به لا تجوز التضحية بها، كذا في التتارخانية.وقطع اللسان في الثور يمنع، وفي الشاة اختلاف، كذا في القنية.والتي لا لسان لها في الغنم تجوز، وفي البقر لا، كذا في الخلاصة.

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم