روزانہ ایک تسبیح درود شریف پڑھنے کی نذر

استفتاء

کیا فرماتے ہیں مفتیان کرام اس مسئلہ کے  بارے میں کہ میرے سر میں شدید درد تھا تو  میں نے یہ کہا کہ اگر یہ درد ہٹ جائے تو میں روزانہ ایک درود شریف کی تسبیح کیا کروں گی۔ وہ درد میرے سر سے ہٹ گیا ہے مگر میرے دوسرے کچھ امراض کی وجہ سے میں ٹھیک نہیں رہتی جس کی وجہ سے میں وہ درود شریف کی تسبیح نہیں کر سکتی اب اس  بارے میں میرے لیے کیا حکم ہے؟

وضاحت مطلوب ہے کہ : دوسرے امراض کیا ہے جن کی وجہ سے آپ  درود شریف نہیں پڑھ سکتی؟

جواب وضاحت:مجھے کئی مہینوں سے یہ مرض ہے کہ میں غنودگی کی حالت میں رہتی ہوں اور سارا دن سوئی رہتی ہوں  اور جس دن میری طبیعت ٹھیک ہوتی ہے  اس دن درود شریف کی تسبیح کرتی ہوں۔

الجواب :بسم اللہ حامداًومصلیاً

مذکورہ صورت میں آپ کو اپنی نذر حتی الامکان پوری کرنی چاہیے لیکن اگر آپ روزانہ تسبیح نہیں  کر سکتی تو جس دن رہ جائے اس کا حساب کر کے  رکھیں اور جب طبیعت ٹھیک ہو تو اس دن اس کی بھی قضاء  کر لیں۔

امداد الفتاویٰ (550/2) میں ہے:

سوال:  درود شریف کی نذر منعقد ہوتی ہے یا نہیں ؟

الجواب:  في الدرالمختار: ولونذر أن یصلی علی النبی ﷺ کل یوم کذا لزمه وقیل: لا۔وفي رد المحتار: قوله: لزمه لأن من جنسه فرضاً (إلى قوله) قال: ومنه یعلم أنه لایشترط کون الفرض قطعیاً، قوله وقیل: لا، لعل وجهه اشتراط کون الفرض قطعیا  ح (قلت والأحوط الأول)۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم