طلاقِ رجعی کی عدت میں دو سری اور تیسری طلاق دینے کا حکم

استفتاء

ایک آدمی نے اپنی بیوی کو ایک طلاق دی کہ "تجھے طلاق ہے”اوراس کے کچھ عرصہ بعد(ایک ماہ کے اندر) ایک ساتھ دو طلاقیں دیں کہ "تجھے طلاق ہے،تجھے طلاق ہے”اب وہ کہہ رہا ہے کہ یہ ایک ساتھ  دو طلاقیں دو نہیں ہوئیں بلکہ یہ ایک ہی ہوئی ہے۔راہنمائی فرمائیں کہ مذکورہ صورت میں کتنی طلاقیں واقع ہوئیں ہیں؟

وضاحت مطلوب ہےکہ:

سائل کا سوال سے کیا تعلق ہے؟

جوابِ وضاحت:میں ایک امام مسجد ہوں میرے ایک نمازی نے یہ سوال پوچھاہے۔

الجواب :بسم اللہ حامداًومصلیاً

مذکوره صورت ميں اگر واقعتاً شوہر نے بیوی سے  یہ کہا تھا کہ ’’تجھے طلاق ہے ‘‘ اور اس کے بعد ایک ماہ کے اندر یہ کہا تھا کہ ’’تجھے طلاق ہے،   تجھے طلاق ہے‘‘ تو مذکورہ صورت میں تینوں طلاقیں واقع ہوگئی  ہیں  جن کی وجہ سے بیوی شوہر پرحرام ہوگئی ہے،لہذا اب نہ رجوع ہو سکتا ہے اور نہ صلح کی گنجائش ہے ۔ نیز ایک مجلس میں دی گئیں  دو طلاقیں دو ہی ہوتی ہیں نہ کہ ایک، لہٰذا شوہر کا یہ کہنا درست نہیں کہ دو دفعہ طلاق دینے سے ایک ہی طلاق ہوئی ہے۔

توجیہ: مذکورہ صورت میں پہلی مرتبہ جب شوہر نے بیوی سے یہ  کہا کہ ’’تجھے طلاق ہے‘‘ تو ان الفاظ  سے پہلی طلاق واقع ہوگئی پھر اس کے بعد عدت کے اندر جب شوہر نے بیوی سے یہ کہا کہ ’’تجھے طلاق ہے، تجھے طلاق ہے‘‘ تو ان الفاظ سے  الصریح یلحق الصریح کے تحت دوسری اور تیسری  طلاق بھی واقع ہوگئی۔

ہندیہ(201/2)میں ہے:ولو قال لها أنت طالق طالق أو أنت طالق انت طالق أو قال قد طلقتك قد طلقتك أو قال أنت طالق و قد طلقتك تقع ثنتان اذاكانت المرأة مدخولا بها.شامی(4/509) میں ہے:کرر لفظ الطلاق وقع الکل قوله: (کرر لفظ الطلاق) بان قال للمدخولة: انت طالق انت طلاق او قد طلقتک قد طلقتک او انت طالق قد طلتک او انت طالق و انت طالقعلامہ بدرالدین العینی رحمہ اللہ تعالی صحیح بخاری شریف کی شرح عمدۃ القاری (1/232)  میں تحریر فرماتے ہیں:حيث قال مذهب جماهير العلماء من التابعين و من بعدهم منهم الأوزاعي و النخعي و الثورى و ابوحنيفة و أصحابه و مالك و أصحابه والشافعي و أصحابه و احمد و أصحابه و إسحاق و ابوثور و ابوعبيدة و آخرون كثيرون على أن من طلق امرأته ثلاثا يقعن و لكنه يأثمشامی(528/4)میں ہے الصريح يلحق الصريح.ہندیہ(411/2)میں ہے:وإن كان الطلاق ثلاثا في الحرة وثنتين في الأمة لم تحل له حتى تنكح زوجا غيره نكاحا صحيحا ويدخل بها ثم يطلقها أو يموت عنها كذا في الهداية ولا فرق في ذلك بين كون المطلقة مدخولا بها أو غير مدخول بها كذا في فتح القدير.۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم