ترکہ کے تقسیم کی ایک صورت

استفتاء

مسئلہ یہ ہے کہ ایک گھر ہے جس میں دو بھائی اور دو بہنیں وارث  ہیں  جبکہ ایک بھائی فوت ہو چکا ہے اوردوسرا موجود ہے۔ ایک بہن فوت ہو چکی ہے جبکہ  دوسری موجود ہے ۔جو بہن فوت ہو چکی ہے اسکی جوان اولاد  موجود ہے۔ کیا ان کا اس گھر میں حصہ ہے ؟اگر ہے تو کتنا ہے ؟ دوسرا اس گھر کی تقسیم کس طرح ہو گی کیونکہ گھر کے آگے دکانیں بھی موجود ہیں اور جو بہن موجود ہے اسکا کتنا حصہ ہے؟ اور جو بھائی موجود ہے اسکا کتنا حصہ ہے؟ جبکہ وہ گھر اس بھائی کے نام ہے جو فوت ہو چکا ہے؟اس مسئلہ  کو آسان فہم اور وضاحت سے بیان فرما دیں ۔

ایک وضاحت :یہ گھر اصل میں حکومت  کی جگہ ہے عارضی مالک ان کا والد تھا۔ اب قبضہ دونوں بھائیوں کا ہے۔

وضاحت مطلوب ہے:

1) اصل میں گھر کس کی ملکیت تھا؟ بہن اور بھائی کی وفات کب ہوئی جن کا مکان تھا ان سے پہلے یا بعد میں؟

2) عارضی مالک ہونے کا کیا مطلب ہے؟  اگر جگہ حکومت کی ہے تو کیا وہ واپس نہیں لے گی؟اس بارے میں آپ کے علاقے کا عرف کیا ہے؟

3) کیا والدہ حیات ہیں؟ اگر حیات نہیں تو وفات کب ہوئی؟ والد صاحب سے پہلے یا بعد میں؟ دوسرے فوت شدہ بہن بھائیوں سے پہلے یا بعد میں؟

4) جو جو بہن بھائی فوت ہو چکے ہیں ان کے کون کون ورثاء موجود ہیں؟

جواب وضاحت:

1) اصل میں گھر کے مالک ان سب کے والد تھے جو بہت پہلے فوت ہو چکےہیں۔بعد میں بہن فوت ہوئی پھر بھائی فوت ہوا ۔

2) نہیں ۔حکومت واپس نہیں لے گی۔ یہاں نسلیں گزر گئی ہیں ابھی آگے بچے ہو گئے ہیں اور وہ اب  تقسیم کرنا چاہتے ہیں تا کہ کل کو فساد نہ ہو۔جس کا قبضہ ہوتا ہے اسی کی ملکیت سمجھی جاتی ہے۔

3) والدہ کی وفات والد صاحب سے بھی پہلے ہوئی ہے۔ پھر اس کے بعد والد صاحب پھر بہن اور پھر بھائی فوت ہوا۔

4) جو بھائی فوت ہوا ہے اسکی بیوی حیات ہے اور اسکی ایک بیٹی ہے اور جو بہن  فوت ہوئی ہے  اس کا شوہر فوت ہو گیا ہےاس کے بھی جوان بیٹے ہیں جنکا کہنا ہے کہ ہماری ماں کا حصہ بنتا ہے وہ ہمیں دو۔

الجواب :بسم اللہ حامداًومصلیاً

مذکورہ صورت میں  فوت ہونے والى بہن اور بھائی کا بھی حصہ ہو گا جو کہ اب ان کے ورثاء میں تقسیم ہو گا ۔ لہذا مذکورہ گھر پہلے چاروں بہن بھائیوں میں تقسیم ہو گا ۔ تقسیم کا طریقہ کار یہ ہو گا کہ مکان یا مکان کی قیمت کو چھ (6) حصوں میں تقسیم کیا جائے گا ہر بھائی کے دو (2) حصے اور ہر بہن کا ایک (1) حصہ ہو گا۔ تقسیم کی صورت مندرجہ ذیل ہے:

6

2 بهائى                                                2 بہنیں

4                                                                                                                      2

2+2                                                 1+1

پھرفوت شدہ بھائی کا حصہ اس کے ورثاء میں تقسیم ہو گا  اوراس کے آٹھ (8) حصے کیے جائیں گے  جن میں سے ايك (1) حصہ بیوہ کا چار (4) حصے بیٹی کے اور باقی تین(3) حصے میت کے عصبہ (بھائی وبہن )میں  تقسیم ہوں گے جن میں سے موجود بہن کو ایک (1) حصہ اور بھائی کو دو (2)حصے ملیں گے۔تقسیم  کی صورت درج ذیل ہے:

8                                                                    

بیوہ                                                                 بیٹی                                                 بہن و بھائی

1/8                      1/2                                           عصبہ

1                                                       4                                                                                                                                  3

2+1

نوٹ:  فوت شدہ بہن کے ورثاء کی وضاحت  نہ مل سکی۔ اس بہن کا حصہ اس کے ورثاء میں تقسیم ہو گا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم