کیا نامحرم عورت کو سلام کا جواب دینا واجب ہے؟

استفتاء

کیا فرماتے ہیں علماء کرام اس مسئلہ کے بارے میں کہ زید دکاندار ہے اور بعض اوقات سودا لینے کے لیے مستورات دکان میں آتی ہیں اور سلام کرتی ہیں ،تو کیازید کے لیے ان کے اس سلام کا جواب دینا واجب ہے یا ضروری نہیں؟بینوا توجروا

الجواب :بسم اللہ حامداًومصلیاً

مذکورہ صورت میں بھی جواب دینا واجب ہے البتہ اگر عورت  جوان ہو اور فتنے کا اندیشہ ہو توزبان سے جواب نہ دیں بلکہ صرف دل سے  یا آہستہ آواز سے جواب دیں۔

ہندیہ(5/326) میں ہے:

واذا سلمت المراةالاجنبية علي رجل ان كانت عجوزا رد الرجل عليها السلام بلسانه بصوت تسمع وان كانت شابة رد عليها في نفسه .

مسائل بہشتی زیور(2/494) میں ہے:

مسئلہ: اجنبی عورت نے کسی مرد کو سلام کیا ،اگر وہ عورت بوڑھی ہوتو یہ مرد اس کو ایسی آواز سے اپنی زبان سے جواب دے کی وہ عورت سن لے اور اگر یہ عورت جوان ہو تو دل سے  اس کا جواب دے اور اگر اجنبی مرد نے کسی عورت کو سلام کیاتو وہ صرف دل میں جواب دے ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔  ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم