نماز کے پہلے قاعدہ میں "اللھم صل علی محمد” تک  درود پڑھنے پر سجدہ سہو  کا حکم

استفتاء

(1)۔ کیانماز  کےپہلے   قاعدہ   میں  درود شریف "اللهم صل علي محمد”جملہ کے پورا ہونے پر سجدہ  سہو واجب ہوجاتا ہے ؟

(2)۔ایسے ہی سورت فاتحہ جہری  نمازمیں سراً اور سری  نمازمیں جہراً کس حد تک پڑھنے سے سجدہ سہو واجب ہوجاتا ہے؟

الجواب :بسم اللہ حامداًومصلیاً

(1)۔مذکورہ صور ت میں قاعدہ اولی   میں درود شریف "اللهم صل علیٰ محمد”جملہ کے پورا ہونے پر  سجدہ  سہو واجب ہوتا ہے  اس سے کم میں نہیں ۔

(2)۔مذکورہ صورت میں اتنی مقدار پڑھنا جس سے نماز جائز ہوتی  یعنی تیس حروف تو اس سے سجدہ سہو لازم ہوجاتا ہے۔

فتاوی ہندیہ (1/274) میں ہے:

"واختلفوا في قدر الزيادة فقال بعضهم يجب عليه سجود السهو بقوله اللهم صل على محمد وقال بعضهم لا يجب عليه حتى يقول وعلى آل محمد والأول أصح”

درمختار(2/658۔657) میں ہے:

” والجهر فيما يخافت فيه  للإمام وعكسه  لكل مصل في الأصح والأصح تقديره  بقدر ما تجوز به الصلاة في الفصلين "

مسائل  بہشتی زیور(1/229)  میں ہے:

"مسئلہ :اگر آہستہ آواز  کی نماز میں کوئی شخص خوہ امام ہو یا منفرد  بلند آواز سے قرأت کرجائے یا بلند آوازکی نمازمیں امام آہستہ آواز سے قرأت کرےاوراس کی مقدار اتنی ہو جس سے نماز جائز ہوتی ہے یعنی تیس حروف کے بقدر تو اس سے سجدہ سہوکرنا چاہیئے۔۔۔۔”

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم