جمعہ کی اذان ثانی امام کے سامنے دینا ضروی ہے یا دائیں بائیں؟

استفتاء

جمعہ کے دن دوسری اذان جس کو امام کے سامنے دینے کا حکم ہے ،بالکل سامنے دینا ضروری ہے یا تھوڑا دائیں بائیں بھی ہو سکتے ہیں ؟ اگر ہو سکتے ہیں تو کتنا ؟ جس بھی درجہ (مستحب ،سنت ،واجب ) کا حکم ہے اس کا ثواب حاصل کر نے کے لیے ۔

الجواب :بسم اللہ حامداًومصلیاً

دوسری اذان کا امام کے سامنے دینا سنت ہے بالکل سامنے دینا ضروری نہیں، امام کے سامنے تھوڑا دائیں بائیں بھی دے سکتے ہیں، اس کی کوئی خاص حد مقرر نہیں لیکن امام کے قریب قریب اور سامنے ہونا چاہیے۔

فتاویٰ عثمانی(1/366) میں ہے:

جمعہ کی اذان ثانی کا خطیب کے سامنے ہونا مسنون ہے۔ في الدرالمختار: ويؤذن ثانيا بين يديه أى الخطيب وقال تحته أى على سبيل السنية كما يظهر من كلامهم. رملى

امداد الفتاویٰ (1/549) میں ہے:

سوال: کیا تحقیق ہے علماء کی اس باب میں کہ اذان ثانی جمعہ کا فعل جو عند المنبر یا  مابین یدی الخطیب لکھا ہے آیا  مراد اس سے مطلق قریب ہے خواہ بالمعنیٰ المتبادر یا عام اس سے اور خواہ مع المحاذاۃ یا عام اس سے۔

جواب: اکثر کتب کی عبارات تو محتمل وجہین کو ہے مگر جامع الرموز کی عبارت صریح ہے قریب متبادر ومحاذات میں۔ وهو هذه بين يديه أى بين الجهتين المسامتتين ليمين المنبر أو الامام ويساره قريبا منه ووسطهما بالسكون فيشمل ما إذا أذن في زاوية قائمة او حادة او منفرجة حادثة من خطين خارجين من هاتين الجهتين، قلت تحدث القائمة اذا كان المؤذن حذاء وسط المنبر بالحركة والمنفرجة والحادة اذا كان في غير حذائه وصورتهما هكذا

وقلت دليل ذلك كله توارث.

عمدۃ الفقہ(2/446) میں ہے:

جب خطیب خطبہ پڑھنے کے لیے منبر پر بیٹھے تو اس کے سامنے دوبارہ اذان دینا (سنت ہے) اس اذان کا خطیب کے سامنے ہونا سنت ہے جیساکہ اقامت اور سامنے سے مراد یہ ہے کہ منبر یا امام کے بالکل سامنے ہو یا دائیں طرف یا بائیں طرف اس کے قریب ہو پس یا تو زاویہ قائمہ میں واقع ہوگا یا حادہ یا منفرجہ میں تینوں طرح صحیح ہے۔ (سامنے  سے یہ مراد نہیں کہ منبر سے متصل ہو یعنی صف اول میں ہو بلکہ ایک یا دو یا کچھ صفوں کے بعد ہو تب بھی مضائقہ نہیں)

احسن الفتاویٰ(4/136) میں ہے:

سوال: جمعہ کے د خطبہ سے پہلے جو اذان کہی جاتی ہے اس کا خطیب کے سامنے ہونا ضروری ہے یا دائیں بائیں بھی کہی جاسکتی ہے؟ نیز اگر پہلی صف کے بجائے صف سے آگے یا پیچھے کہی جائے تو کیا یہ صحیح ہے؟

الجواب: صف اول کی قید تو کہیں نہیں ملتی، البتہ کتب فقہ کے الفاظ امام المنبر، عند المنبر اور بین یدی المنبر  سے ثابت ہوتا ہے کہ یہ اذان منبر کے سامنے اور قریب ہونا چاہیے۔ وصرح به القهستانى حيث قال واذا جلس الامام على المنبر اذن اذانا ثانيا بين يديه أى بين الجهتين المسامتتين ليمين المنبر أو الامام ويساره قريبا منه ووسطهما بالسكون فيشمل ما إذا أذن في زاوية قائمة او حادة او منفرجة(جامع الرموز ص:18ج1) منبر سے قریب ہونا صف اول  کو مستلزم نہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم