نماز پڑھتے ہوئے احرام کا کپڑا اگر چہرے کو لگ جائے تو کیا حکم ہے؟

استفتاء

اگر نماز پڑھتے ہوئے احرام منہ کو لگ جائے تو اس کا کیا حکم ہے؟

الجواب :بسم اللہ حامداًومصلیاً

اگر خود بخود لگ جائے اور فوراً ہٹا دیا جائے تو کچھ واجب نہ ہوگا اور فوراً نہیں ہٹایا تو فدیہ دینا ہوگا، فدیہ کی تفصیل یہ ہے کہ کپڑا چوتھائی چہرے یا اس سے زیادہ کو تھوڑی دیر یعنی ایک گھنٹہ سے کم کم لگا رہے تو ایک مٹھی گندم یا اس کی قیمت صدقہ کرنا ہوگی۔

الفقہ الاسلامی وادلتہ (3/2294-2295) میں ہے:

اما المرأة ……….. ‌وإحرامها ‌في ‌وجهها، فيحرم عليها تغطيته في إحرامها……. واجاز  الشافعية والحنفية ………… فقالوا: للمرأة أن تسدل على وجهها ثوباً متجافياً عنه ‌بخشبة ……….. فإن وقعت الخشبة فأصاب الثوب وجهها بغير اختيارها ورفعته في الحال، فلا فدية. وإن كان عمداً وقعت بغير اختيارها فاستدامت، لزمتها الفدية.

مناسک ملا علی قاری (ص:299) میں ہے:

(ثم لا فرق في وجوب الجزاء فيما إذا جني عامدا أو خاطئا) …….. (مبتدئا او عائدا) …….. (ذاكرا) لاحرامها (أو ناسيا عالما او جاهلا) أى في فعله (نائما أو منتبها) …….. (بمباشرته) أى جنى بمباشرة نفسه (او بمباشرة غيره به بامره) …….. أو (بغيره) أى بغير أمره.

غنیۃ الناسک (ص:255) میں ہے:

 وليس للمرأة أن تنتقبت وتغطى وجهها ……. ولو كانت تستر وجهها، وتكشفه أخرى وهكذا تفعل في كل مرة أقل من ساعة فلكية فعليها لكل مرة قبضة من طعام

عمدۃ الفقہ (6/490) میں ہے:

عورت کو نقاب یا برقعہ یا کوئی اور کپڑا اس طرح پہننا کہ وہ کپڑا چہرے کو مس کرے منع ہے ……………  اور اگر کبھی منہ کو کپڑے سے  ڈھانپ لیتی ہے اور کبھی کھول لیتی  ہے اور اس طرح بار بار حسب ضرورت پردے کے لیے کرتی ہے  اگر ہر دفعہ کپڑا اس کے چہرے کو ایک ساعت فلکیہ (ایک گھنٹہ) سے کم وقت تک لگا رہا تو ہر دفعہ کے لیے ایک مٹھی (لپ) گندم صدقہ کرنا  واجب ہے۔

مسنون عمر ہ از ڈاکٹر مفتی عبدالواحد صاحبؒ (ص:44-45) میں ہے:

5- عورت اپنے چہرے سے کپڑا نہ لگنے دے

حالت احرام میں اگر  عورت کے چہرے سے نقاب لگ جائے مثلاً جب کہ سوئی ہوئی ہو  تو اگر(12) بارہ  گھنٹے یا زائد گھنٹے لگا رہے تو ایک دم واجب ہوگا اور (12) بارہ گھنٹے سے کم لگا رہے تو پونے ددو کلو گندم یا اس کی قیمت صدقہ کرے اور ایک گھنٹہ سے بھی کم لگا رہے تو مٹھی بھر گندم صدقہ کرے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم