ایک مسجد کی کتابوں کو دوسری مسجد میں منتقل کرنے کا حکم

استفتاء

السلام علیکم  محترم علماء ومفتیان کرام ایک مسئلہ یہ پوچھنا تھا کہ ہماری مسجد کی الماری میں بہت سی دینی کتابیں کئی سالوں سے رکھی ہوئی ہیں جو صرف الماری کی زینت ہیں  کوئی اٹھاکر ان کو نہیں پڑھتا کیا وہ کتابیں کسی مدرسہ یا لائبریری میں دی جاسکتی ہیں جہاں لوگ پڑھ کر فائدہ اٹھا تے ہوں؟

الجواب :بسم اللہ حامداًومصلیاً

اگر لوگ سمجھانے اور  ترغیب دینے کے باوجود بھی ان کو نہ پڑھیں تو کسی قریبی مسجد یا مدرسہ میں دی جاسکتی ہیں جہاں لوگ پڑھ کر فائدہ اٹھاتے ہوں۔

الدر المختار(6/559)میں ہے:

وفي الدرر وقف مصحفا على أهل مسجد للقراءة إن يحصون جاز وإن وقف على المسجد جاز ويقرأ فيه، ولا يكون محصورا على هذا المسجد وبه عرف حكم نقل كتب الأوقاف من محلها للانتفاع بها.

کفایت المفتی(7/257)میں ہے:

زائد قرآن مجیدوں کو دوسری مساجد یا مدرسوں میں پڑھنے کے لئے دےدیا جائے کیونکہ ان کے وقف کرنے والوں کی غرض یہی ہے کہ ان قرآن مجیدوں میں تلاوت کی جائے ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم