لڑكی کا گھر میں اور قرآن کے قریب ننگے سر رہنے کا حکم

استفتاء

1) لڑکی گھر کے اندر سر  سے دوپٹہ اتار کر رہ سکتی ہے؟

2) اگر پاس قرآن کھلا ہو اور لڑکی نے دوپٹہ نہ لیا ہو تو  گناہ ہوتا ہے؟

الجواب :بسم اللہ حامداًومصلیاً

1- عورت کو گھر میں دوپٹہ اتارنے کی اجازت ہے اور اس سے کوئی گناہ نہیں ہوتا لیکن بہتر یہی ہے کہ  دوپٹہ لیا جائے اگرچہ باریک ہی ہو۔

2- قرآن پاس موجود ہو اور دوپٹہ نہ لیا ہو تو کوئی گناہ نہیں لیکن تلاوت کے وقت سر ڈھانپ لے کیونکہ تلاوت قرآن کے آداب میں سے یہ بات ہے کہ اچھی حالت میں اہتمام کے ساتھ تلاوت کرے جس میں سر ڈھانپنا بھی شامل ہے۔

فتاوی العالمگیریہ، کتاب الکراهیۃ، الباب التاسع فی اللبس (طبع: مکتبہ رشیدیہ، جلد نمبر 9صفحہ نمبر 132) میں ہے:

“يرخص للمرأة كشف الرأس في منزلها وحدها فأولى أن يجوز لها لبس خمار رقيق يصف ما تحته عند محارمها كذا في القنية”

فتاوی العالمگیریہ، کتاب الکراھیۃ،  الباب الرابع (طبع: مکتبہ رشیدیہ، جلد نمبر9 صفحہ نمبر  93) میں ہے:

“رجل اراد ان یقراالقرآن فینبغی ان یکون علی احسن احواله یلبس صالح ثیابه ویتعمم ویستقبل القبلة لان تعظیم القرآن والفقه واجب”

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔فقط واللہ تعالی اعلم